٩٥٥: عبدالرحمن بن یزید نے عبداللہ (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) کو کبھی نہیں دیکھا کہ کبھی آپ نے غیر وقت میں کوئی نماز پڑھی ہو البتہ آپ نے عرفات میں مزدلفہ میں دو نمازوں کو جمع فرمایا اور مزدلفہ کی صبح کو فجر کی نماز عام وقت سے مختلف پڑھی۔ جو کچھ ہم نے ذکر کیا اس سے یہ معلوم ہوتا ہے کہ آپ (صلی اللہ علیہ وآلہ وسلم) کے دو نمازوں کو جمع کرنے کا جو مشاہدہ کیا گیا ہے وہ ہمارے مخالفین کی تاویل کے خلاف ہے اس باب کا یہ حکم جناب رسول اللہ (صلی اللہ علیہ وآلہ وسلم) کے دو نمازیں جمع کرنے کی روایت کے معانی کو درست رکھنے کیلئے ہے اور آپ (صلی اللہ علیہ وآلہ وسلم) سے یہ بھی مروی ہے کہ آپ (صلی اللہ علیہ وآلہ وسلم) نے دو نمازوں کو اقامت اور بغیر خوف کی حالت کے جمع کیا جس طرح کہ آپ (صلی اللہ علیہ وآلہ وسلم) نے سفر کی حالت میں جمع کیا پس اقامت کی حالت میں بغیر خوف اور بغیر بیماری کے یہ جائز ہے کہ ظہر کو سورج کے پیلا پڑنے کے قریب تک مؤخر کرے پھر نماز ادا کرے حالانکہ جناب رسول اللہ (صلی اللہ علیہ وآلہ وسلم) نے اس کو نماز میں تفریط قرار دیا۔
تخریج : بخاری فی الحج باب ٩٩‘ مسلم فی الحج روایت نمبر ٢٩٢۔
اب یہ روایت ابن مسعود (رض) ماقبل مذکور روایت کے خلاف جمع صوری کی مؤید ہے پس ماننا پڑے گا کہ اس روایت میں بھی جمع صوری مراد ہے پس آثار مرویہ کے معانی کو سامنے رکھتے ہوئے جمع بین الصلاتین کی یہی صورت ہوسکتی ہے۔
جمع بین الصلاتین کی روایات تو سفر و حضر دونوں کے متعلق ثابت ہیں اگر جمع حقیقی مانیں تو پھر حضر میں خوف و مرض کے بغیر کیا آپ ظہر کو اس قدر مؤخر کرنے کی اجازت دیں گے کہ آفتاب تغیر کے قریب تر ہوجائے حالانکہ اس کے متعلق توبیخ کی روایات وارد ہیں جن میں یہ ابو قتادہ (رض) کی روایت ہے۔