٩٩٠: ثور بن یزید نے عکرمہ اور انھوں نے ابن عباس (رض) سے نقل کیا کہ صلوۃ وسطیٰ تو نماز صبح ہے اور اس کو وسطیٰ کہنے کی وجہ یہ ہے کہ اس نے رات کی سیاہی اور دن کے چاندنے میں فاصلہ کردیا ہے۔ یہ ابن عباس (رض) ہیں جنہوں نے اطلاع دی ہے کہ جن حضرات نے فجر کی نماز کو نماز وسطیٰ کہا ان کے ہاں علت یہی ہے حالانکہ اس میں یہ بھی احتمال ہے کہ آیت : ” وقوموا اللہ قانتین “ سے مراد نماز صبح ہو تو اس صورت میں قنوت سے طول قیام مراد ہوگا جیسا کہ آپ (صلی اللہ علیہ وآلہ وسلم) سے دریافت کیا گیا کہ کونسی نماز افضل ہے ؟ تو آپ (صلی اللہ علیہ وآلہ وسلم) نے فرمایا کہ جس کا قنوت یعنی قیام لمبا ہو۔ ہم نے یہ روایت پوری اسناد سے اپنے موقع پر ذکر کی ہے اور حضرت عائشہ صدیقہ (رض) سے بھی مروی ہے کہ انھوں نے فرمایا کہ فجر میں دو رکعتیں طول قیام کی وجہ سے رکھی گئی ہیں اور ہم نے یہ بات اور جگہ بھی ذکر کی ہے اور یہ بھی احتمال ہے کہ ” وقوموا اللہ قانتین “ والی آیت میں ہر نماز کا قنوت مراد ہو۔ خواہ وہ درمیان ہو یا دیگر اور حضرت ابن عباس (رض) سے نماز وسطیٰ کے بارے میں مروی ہے کہ وہ نماز عصر ہے۔
حاصل روایات : کہ فجر کی نماز کو وسطیٰ کہنے کی علت یہ ہے کہ سواد لیل اور بیاض نہار میں جدائی کرنے والی ہے پس آیت مذکورہ والی صلوۃ وسطیٰ مراد نہ ہوئی۔
ایک اور جواب :
یہ بھی ممکن ہے کہ اس سے صبح کی نماز مراد لی جائے اور قنوت سے طول قیام مراد لیا جائے جیسا کہ آپ سے پوچھا گیا کون سی نماز افضل ہے تو فرمایا طول قنوت یعنی طویل قیام والی جب قیام کی طوالت مراد ہے تو اس کو قنوت نازلہ قرار دے کر صلوۃ وسطیٰ کی دلیل بنانا درست نہیں اور یہ روایت دوسرے مقام پر اسی کتاب میں مذکور ہے۔
حضرت عائشہ (رض) نے باب صلوۃ المسافر میں ذکر کیا ہے کہ مکہ مکرمہ میں رکعات کی تعداد کم تھی مدینہ منورہ میں اضافہ کیا گیا فجر میں طویل قراءت کی وجہ سے اضافہ نہیں کیا گیا تو گویا ان کے ہاں بھی قنوت سے مراد طویل قراءت ہے۔
وقد یحتمل :
اس سے امام طحاوی (رح) یہ بتلا رہے ہیں کہ { وَقُوْمُوْا لِلّٰہِ قٰنِتِیْنَ } [البقرہ : ٢٣٨] صلوۃ وسطیٰ اور دیگر تمام نمازوں سے متعلق ہے۔
وقدروی :
سے یہ جواب دینا چاہتے ہیں کہ ابن عباس (رض) کے ہاں صلوۃ وسطیٰ سے مراد نماز عصر ہے جیسا کہ اس روایت میں موجود ہے۔