٩٩٨: زر نے حضرت علی مرتضیٰ سے روایت کی ہے کہ غزوہ احزاب میں ہم کفار سے قتال میں مشغول رہے جس سے نماز عصر جاتی رہی یہاں تک کہ سورج غروب ہونے کے قریب پہنچ گیا جناب رسول اللہ (صلی اللہ علیہ وآلہ وسلم) نے اس طرح بددعا فرمائی ” اللہم املأ قلوب الذین شغلونا عن الصلاۃ الوسطٰی نارا واملأ بیوتہم نارا واملأ قبورہم ناراً اے اللہ جنہوں نے ہمیں صلوۃ وسطیٰ سے مشغول کردیا ان کے دلوں ‘ گھروں اور قبور کو آگ سے بھر دے ۔ حضرت علی (رض) فرماتے ہیں کہ ہم خیال کرتے تھے کہ صلوۃ فجر صلوۃ وسطیٰ ہے (مگر اس ارشاد سے معلوم ہوا کہ وہ نماز عصر ہے) یہ حضرت علی (رض) ہیں ‘ جو فرما رہے ہیں کہ ہم جناب رسول اللہ (صلی اللہ علیہ وآلہ وسلم) کے ارشاد سے پہلے اسے نماز صبح خیال کرتے تھے جب آپ (صلی اللہ علیہ وآلہ وسلم) کا ارشاد اس سے متعلق سنا تو اس سے انھوں نے جان لیا کہ وہ نماز عصر ہے ‘ اس کے متعلق روایات ملاحظہ ہوں۔
تخریج : بخاری فی الجہاد باب ٩٨‘ المغازی باب ٢٩‘ مسلم فی المساجد و مواضع الصلاۃ نمبر ٢٠٦‘ ترمذی فی تفسیر وسورۃ نمبر ٢‘ باب ٣١‘ نسائی فی الصلاۃ باب ١٤‘ ابن ماجہ فی الصلاۃ باب ٦‘ نمبر ٦٨٤‘ مسند احمد ١؍٣٠١۔
حاصل روایات : یہ ہے کہ علی (رض) کے ارشاد سے معلوم ہوا کہ کہ وہ نماز فجر کو صلوۃ وسطیٰ خیال کرتے تھے مگر اس ارشاد نبوت کے بعد انھوں نے جان لیا کہ صلوۃ وسطیٰ نماز عصر ہے۔
نوٹ : اس سے یہ بات واضح ہوگئی کہ جن صحابہ کرام (رض) سے اور کسی نماز کے متعلق یہ ارشاد منقول ہے وہ یا تو اس ارشاد سے پہلے کا ہے یا ان کو یہ ارشاد معلوم نہیں ہوا۔