عمر بن ابی سلمہ (رض) سے روایت ہے کہ انہوں نے رسول اللہ ﷺ کو ام المؤمنین ام سلمہ (رض) کے گھر میں اس حال میں نماز پڑھتے دیکھا، کہ آپ ایک کپڑے میں لپٹے ہوئے تھے ١ ؎۔ امام ترمذی کہتے ہیں : ١- عمر بن ابی سلمہ کی حدیث حسن صحیح ہے، ٢- اس باب میں ابوہریرہ، جابر، سلمہ بن الاکوع، انس، عمرو بن ابی اسید، عبادہ بن صامت، ابو سعید خدری، کیسان، ابن عباس، عائشہ، ام ہانی، عمار بن یاسر، طلق بن علی، اور عبادہ بن صامت انصاری (رض) سے بھی احادیث آئی ہیں۔ صحابہ کرام اور ان کے بعد تابعین وغیرہم سے اکثر اہل علم کا عمل اسی پر ہے، وہ کہتے ہیں کہ ایک کپڑے میں نماز پڑھنے میں کوئی حرج نہیں اور بعض اہل علم نے کہا ہے کہ آدمی دو کپڑوں میں نماز پڑھے۔ تخریج دارالدعوہ : صحیح البخاری/الصلاة ٤ (٣٥٦) ، صحیح مسلم/الصلاة ٥٢ (٥١٧) ، سنن ابی داود/ الصلاة ٧٨ (٦٢٨) ، سنن النسائی/القبلة ١٤ (٧٦٥) ، سنن ابن ماجہ/الإقامة ٦٩ (١٠٤٩) ، ( تحفة الأشراف : ١٠٦٨٤) ، وکذا (١٠٦٨٢) ، موطا امام مالک/الجماعة ٩ (٢٩) ، مسند احمد (٤/٢٦، ٢٧) (صحیح) وضاحت : ١ ؎ : شیخین کی روایت میں «واضعاً طرفيه علی عاتقيه» کا اضافہ ہے یعنی آپ اس کے دونوں کنارے اپنے دونوں کندھوں پر ڈالے ہوئے تھے ، اس سے ثابت ہوا کہ اگر ایک کپڑے میں بھی نماز پڑھے تو دونوں کندھوں کو ضرور ڈھانکے رہے ، ورنہ نماز نہیں ہوگی ، اس بابت بعض واضح روایات مروی ہیں ، نیز اس حدیث سے یہ بھی ثابت ہوا کہ آپ نے اس وقت سر کو نہیں ڈھانکا تھا ، ایک کپڑے میں سر کو ڈھانکا ہی نہیں جاسکتا۔ قال الشيخ الألباني : صحيح، ابن ماجة (1049) صحيح وضعيف سنن الترمذي الألباني : حديث نمبر 339