زید بن ارقم (رض) کہتے ہیں کہ ہم رسول اللہ ﷺ کے پیچھے نماز میں بات چیت کرلیا کرتے تھے، آدمی اپنے ساتھ والے سے بات کرلیا کرتا تھا، یہاں تک کہ آیت کریمہ : «‏وقوموا لله قانتين» اللہ کے لیے با ادب کھڑے رہا کرو نازل ہوئی تو ہمیں خاموش رہنے کا حکم دیا گیا اور بات کرنے سے روک دیا گیا۔ امام ترمذی کہتے ہیں : ١- زید بن ارقم (رض) کی حدیث حسن صحیح ہے، ٢- اس باب میں ابن مسعود اور معاویہ بن حکم (رض) سے بھی احادیث آئی ہیں، ٣- اکثر اہل علم کا عمل اسی پر ہے کہ آدمی نماز میں قصداً یا بھول کر گفتگو کرلے تو نماز دہرائے۔ سفیان ثوری، ابن مبارک اور اہل کوفہ کا یہی قول ہے۔ اور بعض کا کہنا ہے کہ جب نماز میں قصداً گفتگو کرے تو نماز دہرائے اور اگر بھول سے یا لاعلمی میں گفتگو ہوجائے تو نماز کافی ہوگی، ٤- شافعی اسی کے قائل ہیں ١ ؎۔ تخریج دارالدعوہ : صحیح البخاری/العمل فی الصلاة ٢ (١٢٠٠) ، وتفسیر البقرة ٤٢ (٤٥٣٤) ، صحیح مسلم/المساجد ٧ (٥٣٩) ، سنن ابی داود/ الصلاة ١٧٨ (٩٤٩) ، سنن النسائی/السہو ٢٠ (١٢٢٠) ، ( تحفة الأشراف : ٣٦٦١) ، مسند احمد (٤/٣٦٨) ، ویأتي عند المؤلف في تفسیر البقرة برقم : ٢٩٨٦) (صحیح) وضاحت : ١ ؎ : رسول اکرم ﷺ کے فرمان کے مطابق مومن سے بھول چوک معاف ہے ، بعض لوگوں نے یہ شرط لگائی ہے کہ بشرطیکہ تھوڑی ہو ہم کہتے ہیں ایسی حالت میں آدمی تھوڑی بات ہی کر پاتا ہے کہ اسے یاد آ جاتا ہے۔ قال الشيخ الألباني : صحيح، صحيح أبي داود (875) ، الإرواء (393) صحيح وضعيف سنن الترمذي الألباني : حديث نمبر 405