Sunan Al Bayhaqi: Hadith 20988

(٢٠٩٨٢) ابوسلمہ بن عبدالرحمن فرماتے ہیں کہ حضرت عائشہ (رض) فرماتی ہیں کہ رسول اللہ (صلی اللہ علیہ وآلہ وسلم) غزوہ تبوک سے واپس آئے اور میں نے اپنے حجرہ کے دروازے پر چادر تان رکھی تھی۔ میرے گھر کی چوڑائی کی جانب پردہ تھا۔ آپ (صلی اللہ علیہ وآلہ وسلم) گھر میں داخل ہوئے پردہ دیکھا اور فرمایا : اے عائشہ ! یہ دینا۔ آپ نے پردہ پھاڑ دیا اور زمین پر گرا دیا۔ اس طاق کے اندر میری گڑیاں تھیں۔ ہوا کے چلنے کی وجہ سے وہ نظر آنے لگی۔ آپ نے پوچھا : اے عائشہ ! یہ کیا ہے ؟ عرض کیا : میرے کھلونے۔ آپ نے دیکھا : ان کے درمیان ایک گھوڑا تھا جس کے کپڑے کے پر تھے، آپ نے پوچھا : یہ درمیان میں کیا ہے ؟ کہنے لگی : گھوڑا۔ آپ نے پوچھا : اس کے اوپر کیا ہے ؟ کہتی ہیں : اس کے دو پر۔ آپ نے فرمایا : گھوڑے کے پر ہوتے ہیں۔ کہنے لگیں : کیا آپ نے نہیں سنا کہ حضرت سلیمان (علیہ السلام) کے پاس گھوڑا تھا، اس کے پر تھے۔ آپ ہنس پڑے یہاں تک داڑھیں ظاہر ہوگئی۔
(ب) ایک حدیث میں ہے کہ آپ غزوہ تبوک یا خیبر سے واپس ہوئے ۔ آپ سے تصاویر کی حرمت ثابت ہے، ممکن ہے یہ واقعہ حرمت سے پہلے کا ہو۔ حضرت ابوہریرہ (رض) ممانعت والی حدیث کے راوی ہیں۔ یہ غزوہ خیبر کے زمانہ میں مسلمان ہوئے ہیں۔ ممکن ہے ان کا سماع بعد میں ہو۔
حضرت جابر کی حدیث میں ہے کہ آپ نے حضرت عمر بن خطاب (رض) کو فتح مکہ کے زمانہ میں جب وہ بطحامقام پر تھے حکم دیا کہ کعبہ سے تمام تصاویر ختم کردی جائیں، نبی (صلی اللہ علیہ وآلہ وسلم) کعبہ میں داخل ہوئے جب تمام صورتیں ختم کردی گئی۔
شیخ (رح) فرماتے ہیں : فتح کا زمانہ خیبر کے بعد کا ہے۔ اس وقت وہ چھوٹی تھیں، جب ان کی رخصتی نبی (صلی اللہ علیہ وآلہ وسلم) کے ساتھ کی گئی۔ ان کے ساتھ کھلونے تھے۔