Sunan Al Bayhaqi: Hadith 3988

(٣٩٨٨) ابی بن کعب (رض) سے روایت ہے کہ نبی (صلی اللہ علیہ وآلہ وسلم) بنو غفار کے تالاب کے پاس تھے کہ جبرائیل (علیہ السلام) ان کے پاس آئے اور کہا : اللہ تعالیٰ آپ سے فرماتا ہے کہ آپ کی امت کو کہ قرآن کو ایک لہجہ پر پڑھے، آپ (صلی اللہ علیہ وآلہ وسلم) نے فرمایا : میں اللہ سے بخشش اور مغفرت چاہتا ہوں۔ کیونکہ میری امت میں اتنی طاقت نہیں۔ وہ پھر لوٹ کر آئے اور کہا کہ اللہ تعالیٰ آپ کو اور آپ (صلی اللہ علیہ وآلہ وسلم) کی امت کو حکم دیتا ہے کہ قرآن کو دو لہجوں میں پڑھیں۔ رسول اللہ (صلی اللہ علیہ وآلہ وسلم) نے فرمایا : میری امت اس کی طاقت نہیں رکھتی۔ جبرائیل (علیہ السلام) پھر لوٹ کر آئے اور کہا : اللہ تعالیٰ آپ کو اور آپ (صلی اللہ علیہ وآلہ وسلم) کی امت کو فرماتا ہے کہ قرآن کو تین حروف پر پڑھیں، آپ (صلی اللہ علیہ وآلہ وسلم) نے فرمایا : میں اللہ سے عافیت اور مغفرت طلب کرتا ہوں کیونکہ میری امت میں اتنی طاقت نہیں ہے۔ پھر جبرائیل (علیہ السلام) آپ (صلی اللہ علیہ وآلہ وسلم) کے پاس آئے اور فرمایا : اللہ تعالیٰ آپ کو اور آپ کی امت کو فرماتا ہے کہ قرآن کو سات لہجوں پر پڑھو، جس بھی لہجے پر پڑھیں گے درستگی کو پائیں گے۔