Sunan Al Bayhaqi: Hadith 6205

(٦٢٠٥) ابن عباس (رض) فرماتے ہیں کہ میں نمازِ فطر کے لیے رسول اللہ (صلی اللہ علیہ وآلہ وسلم) ابوبکر (رض) ‘ عمر (رض) عثمان (رض) کے ساتھ حاضر ہوا، وہ خطبہ سے پہلے نماز پڑھتے تھے۔ اس کے بعد خطبہ ارشاد فرماتے تھے۔ راوی فرماتے ہیں کہ گویا میں نبی (صلی اللہ علیہ وآلہ وسلم) کو دیکھ رہا ہوں منبر سے اترتے ہوئے اور آپ (صلی اللہ علیہ وآلہ وسلم) لوگوں کو اپنے ہاتھوں سے بٹھا رہے تھے۔ پھر آپ ان میں سے راستہ بناتے ہوئے عورتوں کے پاس آئے اور آپ (صلی اللہ علیہ وآلہ وسلم) کے ساتھ بلال بھی موجود تھے۔ آپ (صلی اللہ علیہ وآلہ وسلم) نے یہ آیات تلاوت فرمائی : { یَا أَیُّہَا النَّبِیُّ إِذَا جَائَ کَ الْمُؤْمِنَاتُ یُبَایِعْنَکَ } [الممتحنۃ : ١٢] اے نبی ! جب آپ کے پاس مومنہ عورتیں آئیں، آپ (صلی اللہ علیہ وآلہ وسلم) سے بیعت کرنے کے لیے۔ جب آپ ان سے فارغ ہوئے تو فرمایا : تم ایسے ہی رہنا۔ صرف ایک عورت نے جواب دیا : ہاں۔ اس کے علاوہ کسی نے جواب نہیں دیا۔ اللہ کے نبی (صلی اللہ علیہ وآلہ وسلم) ہم نہیں جانتے کہ وہ کون تھی ؟ فرمایا : تم صدقہ کرو تو بلال (رض) نے کپڑا پھیلایا، پھر فرمایا : اب تم اپنے صدقے دو میرے ماں باپ تم پر فدا ہوں تو وہ اپنی بالیاں اور انگوٹھیاں بلال (رض) کے کپڑے میں پھینک رہی تھیں۔