Sunan Al Bayhaqi: Hadith 7724

(٧٧٢١) حسین بن ولید فرماتے ہیں کہ ابو یوسف حج سے واپسی پر ہمارے پاس تشریف لائے اور فرمانے لگے کہ میں چاہتا ہوں کہ تم پر علم کا ایک ایسا دروازہ کھولوں جس نے مجھے تیار کیا اور میں انھیں چھوڑ کر مدینے چلا آیا ، پھر میں نے صاع کے بارے میں پوچھا تو انھوں نے فرمایا : یہ ہمارا صاع رسول اللہ (صلی اللہ علیہ وآلہ وسلم) کا صاع ہے۔ میں نے ان سے کہا : تمہاری کیا دلیل ہے ؟ انھوں نے کہا : ہم آپ کے پاس اس کی دلیل لاتے ہیں۔ اگلی صبح میرے پاس پچاس شیوخ کے لگ بھگ آئے جو مہاجرین و انصار کے بیٹے تھے۔ ان میں سے ہر ایک کے پاس اس کی چادر کے نیچے صاع تھا اور ان میں سے ہر ایک اپنے گھر والوں یا والدین سے کہہ رہا تھا کہ یہی رسول اللہ (صلی اللہ علیہ وآلہ وسلم) کا صاع ہے۔ جب میں نے دیکھا تو سب کو برابر پایا اور وہ سواپانچ رطل سے کچھ کم تھا تو میں نے اس کو قوی جانا اور ابوحنیفہ کے قول کو ترک کردیا اور اہل مدینہ کے قول کو قبول کرلیا۔
حسن فرماتے ہیں : میں نے اسی سال حج کیا تو میری ملاقات امام مالک بن انس سے ہوئی۔ میں نے ان سے صاع کے بارے میں پوچھا تو انھوں نے فرمایا : ہمارا یہ صاع رسول اللہ (صلی اللہ علیہ وآلہ وسلم) ہی کا صاع ہے۔ میں نے پوچھا : یہ کتنے رطل کا ہے ؟ تو انھوں نے فرمایا : مکیال کے رطل نہیں ہوتے۔ حسین فرماتے ہیں : پھر میں عبداللہ بن زید بن اسلم سے ملا تو انھوں نے فرمایا : مجھے میرے والد نے میرے دادا کے حوالے سے بتایا ہے کہ یہی حضرت عمر (رض) کا صاع ہے۔