(١٦٤٦١) ابو رجاء سے منقول ہے کہ ابو قلابہ عمر بن عبدالعزیز کے پاس تھے، انھوں نے قسامہ کے بارے میں سوال کیا، انھوں نے جواب دیا کہ نبی (صلی اللہ علیہ وآلہ وسلم) اور خلفاء راشدین نے اس کے ساتھ قصاص لیا ہے۔ کہا : اے ابوقلابہ ! کیا کہتے ہو ؟ اور کہا آپ کے پاس بڑے بڑے رئیس اور اشراف عرب موجود ہیں، بڑے بڑے لشکر موجود ہیں۔ اگر اہل حمص کا ایک شخص اہل دمشق کے ایک شخص پر بغیر دیکھے چوری کا الزام لگا دے تو کیا آپ اس کا ہاتھ کاٹیں گے ؟ کہا : نہیں۔ کہا : اگر ایسے ہی ٤ آدمی بغیر دیکھے زنا پر گواہی دے دیں تو کیا آپ اسے رجم کریں گے ؟ کہا : نہیں تو عمر (رض) کہنے لگے : اللہ کی قسم ! معاملہ ایسے ہی ہے، ہم نے تو نہیں سنا کہ اس طرح قسامہ کی صورت میں نبی (صلی اللہ علیہ وآلہ وسلم) نے کسی کو قتل کیا ہو۔ عنبسہ بن سعید کہنے لگے : پھر وہ عرینیین والی حدیث کہاں گئی ؟ ابو قلابہ کہنے لگے : یہی حدیث ہمیں حضرت انس (رض) نے سنائی کہ عکل اور عرینہ قبیلے کے چند لوگ نبی (صلی اللہ علیہ وآلہ وسلم) کے پاس آئے، مدینہ کی آب و ہوا انھیں راس نہ آئی تو آپ (صلی اللہ علیہ وآلہ وسلم) نے ان کو اونٹوں کے چرواہے کے ساتھ رہنے کا حکم دیا کہ وہ ان کا دودھ اور پیشاب پئیں۔ وہ چلے گئے، جب صحیح ہوگئی تو انھوں نے چرواہے کو قتل کردیا اور اونٹوں کو لے کر بھاگ گئے۔ نبی (صلی اللہ علیہ وآلہ وسلم) کو دن کے ابتدائی حصے میں اس کا پتہ چلا۔ آپ نے ان کے پیچھے لوگ بھیجے اور دن چڑھے تک ان کو پکڑ کر آپ کے پاس لے آئے، آپ نے ان کے ہاتھ پاؤں کاٹ دیے اور ان کی آنکھوں میں گرم سلائیاں پھیر کر دھوپ میں پھینک دیا، وہ پانی مانگتے تھے لیکن انھیں پانی نہیں دیا گیا حتی ہے وہ مرگئے۔ یہ لوگ تھے جنہوں نے ایمان لانے کے بعد قتل چوری اور پھر کفر کیا۔ عنبسہ کہنے لگے : سبحان اللہ۔ ابو قلابہ کہنے لگے کہ عنبسہ کیا تم مجھ پر جھوٹ کی تہمت لگاتے ہو ؟ کہا : نہیں۔ بلکہ جب تک اللہ آپ کو ان کے درمیان باقی رکھیں گے، اللہ ان لوگوں کو بھلائی پر ہی رکھیں گے۔