ہم سے عبداللہ بن مسلمہ قعنبی نے بیان کیا، ان سے امام مالک (رح) نے بیان کیا، ان سے ابن شہاب نے بیان کیا، ان سے سالم بن عبداللہ نے کہ عبداللہ بن محمد بن ابی بکر نے انہیں خبر دی، انہیں عبداللہ بن عمر (رض) نے خبر دی اور انہیں نبی کریم ﷺ کی پاک بیوی عائشہ صدیقہ (رض) نے کہ نبی کریم ﷺ نے ان سے فرمایا کہ تجھے معلوم ہے جب تیری قوم نے کعبہ کی تعمیر کی تو بنیاد ابراہیم کو چھوڑ دیا تھا۔ میں نے عرض کیا یا رسول اللہ ! پھر آپ بنیاد ابراہیم پر اس کو کیوں نہیں بنا دیتے ؟ آپ ﷺ نے فرمایا کہ اگر تمہاری قوم کا زمانہ کفر سے بالکل نزدیک نہ ہوتا تو میں بیشک ایسا کردیتا۔ عبداللہ بن عمر (رض) نے کہا کہ اگر عائشہ صدیقہ (رض) نے یہ بات رسول اللہ ﷺ سے سنی ہے (اور یقیناً عائشہ (رض) سچی ہیں) تو میں سمجھتا ہوں یہی وجہ تھی جو نبی کریم ﷺ حطیم سے متصل جو دیواروں کے کونے ہیں ان کو نہیں چومتے تھے۔ کیونکہ خانہ کعبہ ابراہیمی بنیادوں پر پورا نہ ہوا تھا۔