ہم سے محمد بن عبداللہ بن مبارک مخری نے کہا، کہا ہم سے قراد ابونوح نے بیان کیا، کہا ہم سے جریر بن حازم نے بیان کیا، ان سے ایوب سختیانی نے، ان سے عکرمہ نے اور ان سے ابن عباس (رض) نے بیان کیا کہ ثابت بن قیس بن شماس (رض) کی بیوی نبی کریم ﷺ کے پاس آئیں اور عرض کیا : یا رسول اللہ ! ثابت کے دین اور ان کے اخلاق سے مجھے کوئی شکایت نہیں لیکن مجھے خطرہ ہے (کہ میں ثابت (رض) کی ناشکری میں نہ پھنس جاؤں) ۔ نبی کریم ﷺ نے اس پر ان سے دریافت فرمایا کہ کیا تم ان کا باغ (جو انہوں نے مہر میں دیا تھا) واپس کرسکتی ہو ؟ انہوں نے عرض کیا جی ہاں۔ چناچہ انہوں نے وہ باغ واپس کردیا اور نبی کریم ﷺ کے حکم سے ثابت (رض) نے انہیں اپنے سے جدا کردیا۔