میں اپنی قوم بنی سالم کی امامت کیا کرتا تھا۔ میں نبی کریم (ﷺ) کی خدمت میں حاضر ہوا اور عرض کی کہ یا رسول اللہ! میری آنکھ خراب ہو گئی ہے اور ( برسات میں ) پانی سے بھرے ہوئے نالے میرے اور میری قوم کی مسجد کے بیچ میں رکاوٹ بن جاتے ہیں۔ میں چاہتا ہوں کہ آپ میرے مکان پر تشریف لا کر کسی ایک جگہ نماز ادا فرمائیں تاکہ میں اسے اپنی نماز کے لیے مقرر کر لوں رسول اللہ (ﷺ) نے فرمایا کہ انشاء اللہ تعالیٰ میں تمہاری خواہش پوری کروں گا صبح کو جب دن چڑھ گیا تو نبی کریم (ﷺ) تشریف لائے۔ ابوبکر رضی اللہ عنہ آپ (ﷺ) کے ساتھ تھے۔ آپ (ﷺ) نے ( اندر آنے کی ) اجازت چاہی اور میں نے دے دی۔ آپ (ﷺ) بیٹھے نہیں بلکہ پوچھا کہ گھر کے کس حصہ میں نماز پڑھوانا چاہتے ہو۔ ایک جگہ کی طرف جسے میں نے نماز پڑھنے کے لیے پسند کیا تھا۔ اشارہ کیا۔ آپ (ﷺ) ( نماز کے لیے ) کھڑے ہوئے اور ہم نے آپ (ﷺ) کے پیچھے صف بنائی۔ پھر آپ (ﷺ) نے سلام پھیرا اور جب آپ (ﷺ) نے سلام پھیرا تو ہم نے بھی پھیرا۔