Sunan Al Daraqutni: Hadith 3470

3471 ۔ حسن بصری ، اللہ کے اس فرمان کے بارے میں بیان کرتے ہیں : تو تم ان عورتوں کو اس بات سے منع نہ کرو، کہ وہ (اپنے سابقہ) شوہروں کے ساتھ شادی کرلیں، اگر وہ مناسب طور پر آپس میں (دوبارہ شادی کرنے پر) راضی ہوں۔
حسن بصری نے فرمایا : حضرت معقل بن یسار مزنی (رض) نے مجھے بتایا : یہ آیت ان کے بارے میں نازل ہوئی تھی۔ انھوں نے اپنی بہن کی شادی ایک شخص کے ساتھ کی، اس شخص نے اس خاتون کو طلاق دے دی، یہاں تک کہ اس عورت کی عدت گزر گئی ، پھر اس شخص نے دوبارہ اس خاتون کے ساتھ شادی کرنے کا پیغام بھیجا، تو میں نے اس سے کہا : میں نے تمہارے ساتھ (اپنی بہن) کی شادی کی ، اسے تمہاری بیوی بنایا، تمہاری عزت افزائی کی اور تم نے اسے طلاق دے دی، اب پھر تم نکاح کا پیغام لے کر آگئے ہو، نہیں ! اللہ کی قسم تم اسے دوبارہ کبھی بھی حاصل نہیں کرسکو گے ، حضرت معقل فرماتے ہیں : اس شخص میں اور کوئی خرابی نہیں تھی، اور وہ عورت بھی اس کے ساتھ شادی دوبارہ کرنا چاہتی تھی ، تو اللہ نے یہ آیت نازل کی۔
(حضرت معقل (رض) بیان کرتے ہیں ) میں نے کہا یارسول اللہ اب میں ایساہی کروں گا، پھر میں نے عورت کی شادی اس شخص کے ساتھ کردی۔ عباد بن راشد نے حسن بصری کے حوالے سے اسی طرح نقل کیا ہے۔ سعید نے قتادہ کے حوالے سے ، حسن بصری کے حوالے سے ، حضرت معقل (رض) سے نقل کیا ہے۔