Sunan Al Daraqutni: Hadith 3471

3472 ۔ حضرت معقل بن یسار (رض) بیان کرتے ہیں : میری ایک بہن تھی ، اس کے ساتھ شادی کے لیے کچھ لوگوں کے رشتے آئے لیکن میں نے انھیں منع کردیا، پھر میرا چچازاد بھائی میرے پاس آیا، اس نے اس لڑکی کے ساتھ شادی کے لیے نکاح کا پیغام بھیجا تو میں نے لڑکی کی شادی اس کے ساتھ کردی، جب تک اللہ کو منظور تھا، وہ دونوں ایک دوسرے کے ساتھ رہے، پھر اس شخص نے اس لڑکی کو طلاق دیدی ، جس میں اسے رجوع کرنے کی گنجائش تھی ، لیکن اس شخص نے رجوع نہیں کیا، یہاں تک کہ لڑکی کی عدت گزر گئی ، اس کے بعد دوسرے لوگوں کے ساتھ اس نے بھی نکاح کا پیغام بھیجا، تو میں نے کہا : میں نے دوسرے لوگوں میں سے کسی کے ساتھ اس لڑکی کی شادی نہیں کی، اور تمہارے ساتھ اس کی شادی کردی، لیکن تم نے اسے طلاق دیدی ، جس میں رجوع کی گنجائش تھی لیکن تم نے رجوع نہیں کیا، یہاں تک کہ اس کی عدت گزر گئی، اب جب اس کے رشتے آرہے ہیں تو تم نے بھی رشتہ بھیج دیا، میں تمہارے ساتھ اس کی شادی کبھی نہیں کروں گا، تو اللہ تعالیٰ نے یہ آیت نازل کی۔ (روای کو شک ہے شاید یہ الفاظ ہیں) یہ آیت نازل ہوئی۔
'' جب تم عورتوں کو طلاق دو اور ان کی عدت پوری ہوجائے تو انھیں اس بات سے منع نہ کرو، کہ وہ (اپنے سابقہ) شوہروں کے ساتھ دوبارہ شادی کرلیں۔
(حضرت معقل (رض) بیان کرتے ہیں ) میں نے اپنی قسم کا کفارہ دیا اور اس لڑکی کی شادی اس شخص کے ساتھ کردی ۔ اس روایت کا مفہوم (ایک دوسرے کے) قریب ہے۔