Ibn Abi Shaybah: Hadith 38061

(٣٨٠٦٢) حضرت علی سے روایت ہے کہ رسول اللہ (صلی اللہ علیہ وآلہ وسلم) مجھے ساتھ لے کر چلے یہاں تک کہ آپ (صلی اللہ علیہ وآلہ وسلم) مجھے لے کر کعبہ میں پہنچے اور پھر فرمایا۔ بیٹھ جاؤ۔ چنانچہ میں کعبہ کی ایک جانب بیٹھ گیا اور رسول اللہ (صلی اللہ علیہ وآلہ وسلم) میرے کندھوں پر سوار ہوئے اور پھر مجھے فرمایا۔ مجھے لے کر اوپر اٹھو۔ مں ر آپ (صلی اللہ علیہ وآلہ وسلم) کو لے کر اوپر اٹھا لیکن (جب) آپ (صلی اللہ علیہ وآلہ وسلم) کو اٹھا کر کھڑے ہونے میں کمزوری دیکھی تو پھر فرمایا۔ بیٹھ جاؤ۔ چنانچہ میں نیچے بیٹھ گیا اور آپ (صلی اللہ علیہ وآلہ وسلم) میرے اوپر سے اتر گئے پھر آپ (صلی اللہ علیہ وآلہ وسلم) میرے لیے بیٹھ گئے اور فرمایا۔ اے علی ! میرے کندھوں پر سوار ہو جاؤ۔ پس میں آپ (صلی اللہ علیہ وآلہ وسلم) کے کندھوں پر سوار ہوگیا پھر جناب نبی کریم (صلی اللہ علیہ وآلہ وسلم) مجھے لے کر اوپر کی طرف بلند ہوئے۔ جب آپ (صلی اللہ علیہ وآلہ وسلم) مجھے لے کر اوپر اٹھے تو مجھے یہ خیال ہوا کہ اگر میں چاہوں تو میں آسمان افق کو بھی ہاتھ میں لاسکتا ہوں پھر میں کعبہ کی چھت پر چڑھ گیا اور رسول اللہ (صلی اللہ علیہ وآلہ وسلم) ایک طرف ہٹ گئے اور مجھے ارشاد فرمایا۔ (اوپر موجود) بتوں میں سے سب سے بڑے بت کو جو کہ قریش ہے نیچے پھینک دو ۔ اور وہ بت تانبے کا تھا اور لوہے کی کیلوں کے ساتھ چھت پر گاڑھا ہوا تھا۔ تو مجھے رسول اللہ (صلی اللہ علیہ وآلہ وسلم) نے حکم فرمایا : اس کو ہلاؤ۔ چنانچہ میں نے اس کو ہلانا شروع کیا اور آپ (صلی اللہ علیہ وآلہ وسلم) مجھے فرماتے جا رہے تھے۔ اور ہلاؤ، اور ہلاؤ۔ پس میں اس کو ہلاتا رہا یہاں تک کہ وہ بت میرے قابو میں آگیا۔ آپ (صلی اللہ علیہ وآلہ وسلم) نے ارشاد فرمایا۔ اس کو نیچے پھینک دو ۔ چنانچہ میں نے اس بت کو نیچے پھینک دیا اور پھر میں (خود بھی) نیچے اتر آیا۔