Ibn Abi Shaybah: Hadith 38207

(٣٨٢٠٨) حضرت عبد خیر سے روایت ہے کہ میں نے حضرت علی کو یہ کہتے سنا کہ نبی کریم (صلی اللہ علیہ وآلہ وسلم) کو اس بہترین حالت میں موت آئی جس بہترین حالت پر انبیاء کرام کو موت آتی ہے۔ پھر حضرت علی نے آپ (صلی اللہ علیہ وآلہ وسلم) کی تعریف بیان کی۔ (پھر) حضرت علی نے کہا۔ اس کے بعد حضرت ابوبکر کو خلیفہ بنایا گیا پس انھوں نے رسول اللہ (صلی اللہ علیہ وآلہ وسلم) کے عمل اور آپ (صلی اللہ علیہ وآلہ وسلم) کی سنت کے مطابق کام کیا۔ پھر حضرت ابوبکر کی موت بھی اس بہترین حالت میں آئی جس پر کسی آدمی کی بہترین موت آسکتی ہے۔ اور حضرت ابوبکر اس امت میں نبی (صلی اللہ علیہ وآلہ وسلم) کے بعد سب سے بہترین شخص تھے۔ پھر حضرت عمر کو خلیفہ بنایا گیا چنانچہ انھوں نے بھی آپ (صلی اللہ علیہ وآلہ وسلم) اور ابوبکر کے عمل اور سنت کے مطابق عمل کیا پھر ان کو بھی اس بہترین حالت میں موت آئی جس پر کسی بھی آدمی کو بہترین موت آسکتی ہے۔ اور حضرت عمر اس امت میں ، نبی کریم (صلی اللہ علیہ وآلہ وسلم) اور حضرت ابوبکر کے بعد سب سے بہترین شخص تھے۔