Kanz al-Ummal: Hadith 18820

18820 ۔۔۔ حضرت انس بن مالک (رض) سے مروی ہے جب حضور اکرم (صلی اللہ علیہ وآلہ وسلم) کافی بیمار ہوگئے تو تکلیف کی شدت سے کبھی ایک ٹانگ اکٹھی کرلیتے اور دوسری کھول دیتے اور کبھی ایک کھولتے اور دوسری اکٹھی کرلیتے (اس طرح آپ کی تکلیف کی شدت کا احساس ہوتا تھا) اس طرح کبھی ایک مٹھی کھولتے دوسری بند کرتے اور کبھی دوسری کھولتے اور پہلی بند کرلیتے ۔ تب فاطمہ (رض) نے فرمایا : ہائے بابا کی تکلیف ! رسول اللہ (صلی اللہ علیہ وآلہ وسلم) نے ارشاد فرمایا : اے بیٹی آج کے بعد تمہارے باپ پر کوئی تکلیف نہ ہوگی ، پھر جب آپ کی روح پرواز کرگئی تو حضرت فاطمہ (رض) بولیں ہائے بابا کو رب نے بلا لیا اور بابا نے لبیک کہا ۔ ہائے بابا جبرائیل کے پاس چلے گئے ۔ ہائے بابا اپنے رب کے کس قدر قریب پہنچ گئے۔ ہائے بابا ! جنت الفردوس آپ کا ٹھکانا بن گیا ۔ حضرت انس بن مالک (رض) فرماتے ہیں : جب ہم نے آپ کو دفن کرلیا تو فاطمہ (رض) مجھے بولیں : اے انس ! تمہارے دلوں نے کیسے گوارا کرلیا کہ تم اپنے ہاتھوں سے رسول اللہ (صلی اللہ علیہ وآلہ وسلم) پر مٹی ڈالو۔ (مسند ابی یعلی ، ابن عساکر)