Kanz al-Ummal: Hadith 18822

18822 ۔۔۔ حضرت انس بن مالک (رض) سے مروی ہے جب حضور اکرم (صلی اللہ علیہ وآلہ وسلم) اپنے مرض الوفات میں مبتلا ہوئے تو حضرت بلال (رض) نے آکر آپ کو نماز کی اطلاع دی ۔ حضور اکرم (صلی اللہ علیہ وآلہ وسلم) نے فرمایا : اے بلال ! تم نے پیغام دے دیا ۔ جو چاہے نماز پڑھ لے اور جو چاہے چھوڑ دے ۔ (یعنی تم مجھے چلنے پر مجبور نہ کرو) حضرت بلال (رض) نے عرض کیا : یا رسول اللہ (صلی اللہ علیہ وآلہ وسلم) پھر لوگوں کو نماز کون پڑھائے گا ؟ حضور اکرم (صلی اللہ علیہ وآلہ وسلم) نے ارشاد فرمایا : ابوبکر کو کہو کہ وہ لوگوں کو نماز پڑھا دیں ، جب سیدنا حضرت ابوبکر صدیق (رض) نماز کے لیے آگے بڑھے تو رسول اللہ (صلی اللہ علیہ وآلہ وسلم) کے آگے سے پردہ اٹھا ۔ حضرت انس بن مالک (رض) فرماتے ہیں : ہم نے آپ کے چہرے کی طرف دیکھا تو گویا وہ ایک سفید ورقہ تھا آپ پر سیاہ قمیص پڑی ہوئی تھی ۔ سیدنا حضرت ابوبکر صدیق (رض) سمجھے شاید آپ نکلنا چاہتے ہیں لہٰذا وہ پیچھے ہٹنے لگے تو رسول اللہ (صلی اللہ علیہ وآلہ وسلم) نے اشارہ فرمایا کہ اپنی جگہ رہ کر نماز پڑھاؤ ۔ پس سیدنا حضرت ابوبکر صدیق (رض) نے نماز پڑھائی ، پھر ہم نے رسول اللہ (صلی اللہ علیہ وآلہ وسلم) کو دوبارہ نہیں دیکھا حتی کہ آپ کا انتقال ہوگیا ۔ (مسند ابی یعلی ، ابن عساکر)