Kanz al-Ummal: Hadith 19255

19255 ۔۔۔ حضرت جبرائیل امین (علیہ السلام) نے بیت اللہ کے پاس دو مرتبہ میری امامت کرائی ۔ (ایک مرتبہ) انھوں نے مجھے ظہر کی نماز پڑھائی جب سورج زائل ہوچکا تھا اور ایک تسمے کے بقدر (زوال) ہوا تھا ۔ اور عصر کی نماز پڑھائی جب سایہ ایک مثل تھا ، اور مغرب کی نماز اس وقت پڑھائی جب روزہ دار روزہ افطار کرتا ہے۔ اور عشاء کی نماز شفق غائب ہونے کے ساتھ پڑھائی اور فجر کی نماز اس وقت پڑھائی جب کھانا پینا روزہ دار پر حرام ہوجاتا ہے۔ لیکن آئندہ روز مجھے ظہر کی نماز اس وقت پڑھائی جب سایہ ایک مثل تھا (گزشتہ روز جس وقت عصر پڑھائی تھی) اور عصر اس وقت پڑھائی جب سایہ دو مثل تھا ۔ اور مغرب کی نماز اس وقت پڑھائی جب روزہ دار روزہ افطار کرتا ہے۔ اور عشاء تہائی رات کے وقت پڑھائی اور فجر کی نماز روشنی ہوجانے کے بعد پڑھائی ۔ پھر حضرت جبرائیل امین (علیہ السلام) میری طرف متوجہ ہو کر فرمانے لگے : اے محمد ! یہ تو آپ سے پہلے انبیاء کا وقت تھا اور ان دونوں وقتوں کے درمیان صحیح وقت ہے۔ (مسند احمد ، ابوداؤد ، ترمذی ، مستدرک الحاکم عن ابن عباس (رض))