Kanz al-Ummal: Hadith 37897

٣٧٨٨٥۔۔۔ (مسند الحکم بن رافع بن الحکم بن رافع بن سنان سے مروی ہے کہ مجھے میرے بعض بزرگوں یعنی والد اور چچاؤں نے بیان کیا کہ ان کے پاس ایک ورقہ (کاغذ) تھا، جو ان میں جاہلیت کے زمانہ سے وراثت دروراثت چلا آرہا تھا۔ حتی کہ اسلام کا ظہور ہوگیا۔ جب نبی اکرم (صلی اللہ علیہ وآلہ وسلم) مدینے تشریف لائے توہم لوگ وہ ورقہ نبی اکرم (صلی اللہ علیہ وآلہ وسلم) کی خدمت میں لے کر آئے۔ وہ آپ کے سامنے پڑھا گیا اس میں لکھا تھا۔
شروع اللہ کے نام سے جس کی بات سچی ہے اور ظالمین کی بات تباہی میں ہے۔ یہ اس امت کا ذکر ہے جو آخری زمانے میں آئے گی، وہ کمر پر ازاریں باندھیں گے، سارے اعضاء غسل میں دھوئیں گے، اپنے دشمنوں سے جنگ کے لیے سمندروں میں بھی گھسیں گے، ان کے اندر ایسی نماز ہوگی کہ اگر وہ قوم نوح میں ہوتی تو وہ پانی کے طوفان سے ہلاک نہ ہوتے اور اگر وہ قوم عاد میں ہوتی تو وہ ہوا سے ہلاک نہ کئے جاتے اور اگر وہ قوم ثمود میں ہوتی تو وہ چیخ سے ہلاک نہ ہوتے، اللہ کے نام سے، جس کا قول حق ہے۔
رسول اللہ (صلی اللہ علیہ وآلہ وسلم) نے ارشاد فرمایا : اس ورقے کو قرآن شریف کے اوراق کے درمیان میں رکھ دو ۔ (راوہ ابو نعیم)