١٣٨١۔۔ ازمسند عبدالرحمن بن غنم الاشعری عبدالرحمن بن غنم سے مروی ہے کہ وہ آپ سے روایت کرتے ہیں کہ آپ کے پاس جبرائیل اس صورت میں تشریف لائے جس میں آپ پہلے ان کو پہچانتے نہ تھے اور انھوں نے آکر آپ کے گھٹنوں پر اپنا ہاتھ رکھ دی اور کہا یارسول اللہ اسلام کیا ہے ؟ فرمایا اسلام یہ ہے کہ تم اپنی ذات اللہ کے سپرد کرو۔ لاالہ الا اللہ محمد رسول اللہ ، کی شہادت دو نماز قائم کرو، زکوۃ ادا کرو، جبرائیل نے کہا اگر میں ان کو بجالاؤں تو کیا میں مسلمان ہوجاؤں گا ؟ آپ نے فرمایا بالکل۔ جبرائیل نے کہا آپ نے سچ فرمایا، پھر استفسار کیا، ایمان کیا ہے یارسول اللہ ، فرمایا ایمان یہ ہے کہ تم اللہ پر یوم آخرت پر ملائکہ پر کتاب اللہ پر، انبیاء پر ممات اور حیات پر حیات بعد الموت پر ایمان لاؤ۔ نیز حساب کتاب پر میزان پر جنت جہنم پر ایمان لاؤ، اور ہر بھلی وبری تقدیر پر ایمان لاؤ، جبرائیل (علیہ السلام) نے کہا اگر میں یہ کرلوں تو کیا میں مومن ہوجاؤں گا، فرمایا جی۔ جبرائیل نے کہا آپ نے سچ فرمایا، پھر استفسار کیا احسان کیا ہے یارسول اللہ ؟ فرمایا یہ کہ تم اللہ سے یوں ڈرو گویا اسے دیکھ رہے ہو۔۔ جبرائیل نے کہا آپ نے سچ فرمایا پھر استفسار کیا قیامت کب واقع ہوگی یارسول اللہ فرمایا سبحان اللہ ، سبحان اللہ ، غیب کی پانچ باتوں کو اللہ کے ماسوا کوئی نہیں جانتا۔ اور اس بارے میں جس سے سوال کیا گیا ہے وہ خودسائل سے زیادہ علم نہیں رکھتا۔ ان اللہ عندہ علم الساعۃ وینزل الغیث ویعلم مافی الارحام، وماتدری نفس ماذاتکسب غدا وماتدری نفس بای ارض تموت۔ بیشک قیامت کا علم اللہ ہی کو ہے وہی بارش نازل کرتا ہے اور رحموں میں جو کچھ ہے اس کو جانتا ہے اور کل آئندہ کو کوئی جی کیا کمانے والا ہے کوئی نہیں جانتا ہے اور کوئی جی نہیں جانتا کہ اس کی کہا موت آئے گی۔ اور اگر تم قبل از قیامت کے متعلق کچھ جانناچاہوتو میں تمہیں بتاتاہوں کہ اس کی کیا علامت ہیں وہ یہ ہیں کہ جب باندی اپنی مالکہ کو جنم دینے لگے اور عمارتیں فلک بوس ہونے لگیں اور توننگے پاؤں والے فقیر لوگوں کو دیکھے کہ وہ لوگوں کی گردنوں کے مالک بنے بیٹھے ہیں۔ صحابہ کرام نے عرض کیا پوچھا یارسول اللہ وہ کون لوگ ہیں ؟ لیکن پھر وہ سائل شخص منہ موڑ کر چلا گیا آپ نے پوچھا سائل کہاں ہے ؟ صحابہ نے عرض کیا ہم پھر اس کا راستہ نہیں پاسکے۔ حضور نے فرمایا یہ جبرائیل تھے تمہیں تمہارا دین سکھانے آئے تھے اور جب بھی وہ میرے پاس آئے میں نے ان کو پہچان لیا سوائے آج کی اس صورت کے ۔ ابن عساکر۔