١٥٧٠۔۔ ازمسند کثم بن الجوان الخزاعی (رض) ۔ ابونہیک (رح) ، شبل بن خلید المزنی (رح) سے روایت کرتے ہیں اور وہ اکثم بن ابی الجون، سے روایت کرتے ہیں وہ فرماتے ہیں کہ ہم نے عرض کیا یارسول اللہ فلاں شخص قتال میں بڑا ہی جرات مند ہے آپ نے فرمایا وہ تو جہنمی ہے ہم نے عرض کیا یارسول اللہ اگر وہ فلاں شخص اپنی عبادت اور جدوجہد اور نرم رویہ کے باجو ود جہنمی ہے توہم کس کھاتے میں ہوں گے ؟ فرمایا یہ محض نفاق کی عجز و انکساری ہے اور یہ جہنم میں جائے گی ۔ راوی کہتے ہیں کہ پھر ہم قتال میں ان کی خاص نگرانی رکھتے تھے تو دیکھا کہ اس کے پاس سے کوئی بھی شہسوار یاپیداہ پاگزرتا ہے تو یہ اس پر کود کر حملہ آور ہوجاتا ہے۔۔ حتی کہ یہ زخموں سے چور ہوگیا یہ ماجرادیکھ کر ہم بارگاہ نبوی میں حاضر ہوئے اور عرض کیا یارسول اللہ وہ توشہید ہواجاتا ہے تب بھی آپ نے فرمایا وہ جہنمی ہے تو بالآخر جب وہ زخموں کی تاب نہ لاسکا تو اس نے اپنی تلوار تھامی اور عین اپنے سینے کے درمیان رکھی اور پھر اس پر اپنازور صرف کرڈالا۔۔ حتی کہ وہ تلوار اس کی پشت سے جانکلی۔ اکثم بن ابی الجون الخزاعی فرماتے ہیں میں آپ کی خدمت میں حاضر ہوا اور کہا میں شہادت دیتاہوں کہ آپ واقعی اللہ کے سچے رسول ہیں۔ تب آپ نے فرمایا آدمی اہل جنت کا عمل کرتا رہتا ہے جبکہ وہ جہنمیوں میں داخل ہوتا ہے اور کبھی آدمی اہل جہنم کا عمل کرتا رہتا ہے جبکہ وہ جنتیوں میں داخل ہوتا ہے لیکن روح نکلتے وقت اس کو شقاوت یا سعادت آلیتی ہے اور اسی پر اس کا خاتمہ ہوجاتا ہے۔ ابن مندہ ، الکبیر للطبرانی ، (رح) ابونعیم۔