١٥٧١۔۔ ازمسند بن مالک (رض) ۔ ابن عساکر (رح) فرماتے ہیں خہ ہمیں ابوالحسن علی بن مسلم الفقیہ نے اپنی ریش تھامے ہوئے بیان کیا کہ وہ فرماتے ہیں کہ ہمیں عبدالعزیز بن احمد نے اپنی ریش تھامے ہوئے بیان کیا وہ فرماتے ہیں کہ ہمیں ابوعمرو عثمان بن ابی بکر نے اپنی ریش تھامے ہوئے خبر دی وہ فرماتے ہیں کہ ہمیں محمد بن اسحاق العبدی نے اپنی ریش تھامے ہوئے بیان کیا، وہ فرماتے ہیں کہ ہمیں احمد بن مہران نے اپنی ریش تھامے ہوئے خبر دی وہ فرماتے ہیں کہ ہمیں سلیمان بن شعیب الکیسانی نے اپنی ریش تھامے ہوئے بیان کیا وہ فرماتے ہیں کہ ہمیں حضرت انس نے اپنی ریش تھامے ہوئے بیان کیا وہ فرماتے ہیں کہ میں نے رسول اکرم کو اپنی ریش تھامے ہوئے یہ فرماتے ہوئے سنا کہ بندہ اس وقت تک مومن نہیں ہوسکتا جب تک کہ وہ اچھی بری شیریں وتلخ ہر طرح کی تقدیر پر ایمان نہ لائے پھر آپ نے اپنی ریش مبارک کو مٹھی میں پکڑتے ہوئے فرمایا میں بھی ہر تقدیر پر خواہ اچھی ہو یا بری اور شیریں ہو یا تلخ، ایمان لاتاہوں اور سنو، آدمی بسا اوقات عرصہ دراز تک اہل جہنم کے عمل کرتا رہتا ہے پھر اس کے سامنے جنت کی راہوں میں سے کوئی راہ پیش آجاتی ہے اور اس پر گامزن ہوجاتا ہے ۔۔ حتی کہ اسی پر اس کی موت آتی ہے اور یہ محض اس لیے ہوتا ہے کہ اس کے مقدر میں یہی لکھا تھا اور بسا اوقات آدمی عرصہ دراز تک اہل جنت کے عمل کرتا رہتا ہے پھر اس کے سامنے جہنم کی راہوں میں سے کوئی راہ پیش آجاتی ہے اور وہ اس پر گامزن ہوجاتا ہے حتی کہ پھر اسی پر اس کو موت آجاتی ہے۔ اور یہ محض اس لیے ہوتا ہے کہ اس کے مقدر میں یہی لکھا تھا۔ الکبیر للطبرانی ، بروایت الغرس بن عمیرہ۔