١٥٧٤۔۔ ازمسند سہل بن سعد الساعدی (رض) ۔ سہل بن سعد سے مروی ہے کہ ایک شخص جو عظیم مسلمانوں میں سے تھا، اس نے نبی کریم کے ساتھ ایک غزوہ میں مسلمانوں کی حمایت میں لڑتے ہوئے خوب مشقت اٹھائی رسول اللہ نے اس کی طرف دیکھا تو فرمایا جو کسی جہنمی شخص کو دیکھنا چاہتا ہو وہ اس شخص کو دیکھ لے، تو قوم کا ایک شخص اس کی ٹوہ میں لگ گیا، دیکھا کہ وہ اسی سخت جانفشانی میں ہے مشرکین پر حملوں میں سب سے زیادہ سخت ہے۔ حتی کہ وہ زخمی ہوگیا لیکن تکلیف و مصیبت کی تاب نہ لاتے ہوئے اس نے موت کی از خود آرزو کی اور اپنی تلوار کی نوک عین سینے میں درمیان رکھدی۔۔ حتی کہ وہ اس کے شانوں سے جانکلی تو یہ شخص جو اس کی ٹوہ میں تھا تیزی سے رسول اللہ کی خدمت میں پہنچا اور عرض کیا یارسول اللہ میں شہادت دیتاہوں کہ آپ اللہ کے سچے رسول ہیں۔ آپ نے دریافت کیا کیا بات ہے ؟ عرض کیا کہ آپ نے فرمایا تھا کہ جو کسی جہنمی شخص کو دیکھنا چاہتا ہو وہ اس شخص کو دیکھ لے جبکہ وہ ہم میں سب سے زیادہ مسلمانوں کی حمایت میں مشقت اٹھانے والا تھا تو میں نے کہا یہ شخص اس حالت میں نہیں مرسکتا۔ جب وہ زخمی ہوگیا تو اس نے از خود موت کی جلد آرزو کی۔ اور اپنے آپ کو قتل کرڈالا۔ تب آپ نے فرمایا آدمی اہل جنت کا عمل کرتا رہتا ہے جبکہ وہ جہنمیوں میں داخل ہوتا ہے اور کبھی آدمی اہل جہنم کا عمل کرتا رہتا ہے جبکہ وہ جنتیوں میں داخل ہوتا ہے لیکن اعمال کا دارومدار خاتمہ پر ہے۔ السنن لابی داؤد۔