١٧٢٧۔۔ حضرت جابر سے مروی ہے کہ ہم رسول اللہ کے ہمراہ تھے ایک مہاجر نے انصاری کو کسی بات پر دھتکاردیا، انصاری نے حمایت کے لیے پکارا ! اے انصار۔۔ مہاجری نے بھی پکارا اے مہاجرین۔۔۔ رسول اللہ نے سناتو فرمایا یہ کیا جاہلیت کے نعرے لگ رہے ہیں لوگوں نے حقیقت حال کی خبر دی آپ نے فرمایا یہ دعوے چھوڑ دو یہ انتہائی متعفن اور غلیط ہیں۔
توچونکہ حضور کے ہجرت فرمانے کے وقت مہاجرین قلیل تعداد میں تھے پھر مہاجرین کی تعداد میں اضافہ ہوگیا اور یہ بات بھی عبداللہ بن ابی رئیس المنافقین کو پہنچی جو پہلے ہی مہاجرین کی بڑھتی ہوئی تعداد سے خارکھائے بیٹھا تھا تو اس نے اپنے لوگوں سے پوچھا کیا واقعی ایسا ہوا ہے ؟ اچھا جب ہم مدینہ پہنچیں گے توہم معزز و شرفاء لوگ ان رذیلوں کو وہاں سے دربدر کردیں گے حضرت عمر نے بارگاہ نبوت میں عرض کیا یارسول اللہ مجھے اجازت دیجئے کہ میں اس منافق کی گردن اڑادوں، آپ نے فرمایا چھوڑ اس کو لوگوں میں چہ میگوئیاں ہوں گی کہ محمد اپنے ہی ساتھیوں کو قتل کرنے لگ گیا ہے۔ المصنف لعبدالرزاق۔