23152 ۔۔۔ عبدالرحمن بن ابی لیلیٰ روایت کرتے ہیں کہ رسول کریم (صلی اللہ علیہ وآلہ وسلم) غم گین ہوئے کہ لوگوں کو نماز کے لیے کیسے جمع کیا جائے چنانچہ آپ (صلی اللہ علیہ وآلہ وسلم) نے فرمایا : میں نے چاہا ہے کہ میں کچھ لوگوں کو بھیجوں جو مدینے کے ٹیلوں پر کھڑے ہو کر ہر قریب والے کو نماز کا بتائیں لیکن مجھے یہ طریقہ اچھا نہ لگا ، لوگوں نے ناقوس کا مشورہ دیا لیکن آپ (صلی اللہ علیہ وآلہ وسلم) کو وہ بھی پسند نہ آیا چنانچہ عبداللہ بن زید (رض) رسول کریم (صلی اللہ علیہ وآلہ وسلم) کے غم میں غم گین گھر واپس لوٹے انھوں نے رات کو خواب میں اذان دیکھی صبح ہوتے ہی رسول کریم (صلی اللہ علیہ وآلہ وسلم) کی خدمت میں حاضر ہوئے اور عرض کیا : یا رسول اللہ (صلی اللہ علیہ وآلہ وسلم) میں خواب میں ایک آدمی کو مسجد کی چھت پر کھڑا دیکھا اس پر سبز رنگ کے دو کپڑے تھے اس نے صدائے اذان بلند کی اور اذان کے کلمات دو دو مرتبہ کہے پھر تھوڑی دیر کے لیے بیٹھ گیا اور پھر اذان کی طرح کلمات کہے اور جب ” حی علی الفلاح حی علی الفلاح پر پہنچا تو اس نے یہ کلمات کہے ” قد قامت الصلوۃ ، قدقامت الصلوۃ اللہ اکبر اللہ اکبر لا الہ الا اللہ “۔ اتنے میں سیدنا حضرت عمر ابن خطاب (رض) حاضر ہوئے اور کہا : یا رسول اللہ (صلی اللہ علیہ وآلہ وسلم) رات کو میرے پاس بھی (خواب میں) اسی طرح ایک آدمی آیا ہے جس طرح کہ اس کے پاس آیا ہے حکم ہوا : پھر تم نے ہمیں خبر کیوں نہیں کی ؟ عرض کیا : چونکہ عبداللہ بن زید (رض) مجھ پر سبقت لے گیا اور مجھے حیاء آگئی نماز کے لیے اعلان کا یہی طریقہ مسلمانوں کو اچھا لگا اور اس کے بعد یہی طریقہ مقرر ہوا حضرت بلال (رض) کو حکم دیا اور انھوں نے اذان دی (رواہ سعید بن المنصور)