30121 ۔۔۔ حضرت بریدہ (رض) کی روایت ہے کہ جب نبی کریم (صلی اللہ علیہ وآلہ وسلم) خیبر کے قریب پہنچے ۔ اہل خیبر گھبرا گئے اور کہنے لگے : محمد اہل یثرب کو لے کر آگیا ہے ، چنانچہ نبی کریم (صلی اللہ علیہ وآلہ وسلم) نے حضرت عمر (رض) کی کمان میں صحابہ کرام رضوان اللہ تعالیٰ عنہم اجمعین کو چڑھائی کے لیے بھیجا یوں سیدنا حضرت عمر بن خطاب (رض) نے پوری جدوجہد سے قتال کیا لیکن بغیر فتح کے واپس لوٹ آئے اور آپ (رض) لوگوں کو اور لوگ انھیں کوستے رہے پھر رسول کریم (صلی اللہ علیہ وآلہ وسلم) نے فرمایا : کل میں جھنڈا ایسے شخص کو دوں گا جو اللہ اور اس کے رسول سے محبت کرتا ہے اور اللہ اور اس کا رسول اس سے محبت کرتا ہے چنانچہ دوسرے دن جھنڈا لینے کے لیے ابوبکر وعمر (رض) آرزو مند ہوئے تاہم آپ (صلی اللہ علیہ وآلہ وسلم) نے سیدنا حضرت علی المرتضی (رض) کو بلایا اس دن انھیں آشوب چشم کی شکایت تھی آپ نے ان کی آنکھوں میں لعاب دہن لگایا پھر انھیں جھنڈا دیا سیدنا حضرت علی المرتضی (رض) لوگوں کو لے کر قلعے کی طرف چل پڑے آپ (صلی اللہ علیہ وآلہ وسلم) کا اہل خیبر سے سامنا ہوا خصوصا مرحب کا سامنا کرنا پڑا مرحب یہ رجز پڑھ رہا تھا : قدعلمت خیبرانی مرحب شاکی السلاح بسطل مجرب اذا للیوث اقبلت تلھب اطعن احیانا وحینا اضرب : ۔ ترجمہ : ۔۔۔ اہل خیبر کو خوب معلوم ہے کہ میں مرحب ہوں سلاح پوش بہادر اور تجربہ کار میں چنانچہ جب شیر مدمقابل ہونے کے لیے سامنے آتے ہیں آگ برسا رہے ہوتے ہیں میں مہارت سے نیزے بھی چلاتا ہوں اور کبھی تلوار کے وار بھی کرتا ہوں ۔ چنانچہ مرحب اور سیدنا حضرت علی المرتضی (رض) کا آمناسامنا ہوا سیدنا حضرت علی المرتضی (رض) نے اس کے سر پر تلوار کا وار کیا تلوار سر کو کچلتی ہوئی اس کے جبڑوں تک جا پہنچی تلوار اس زور سے اس کے سر پر پڑی تھی کہ سارے لشکر نے تلوار چلنے کی آواز سن لی پھر یہودیوں کی ہوا نکل گئی اور یوں مسلمانوں کو فتح نصیب ہوئی ۔ (رواہ ابن ابی شیبۃ)