30152 ۔۔۔ عروہ روایت کی ہے کہ جب نبی کریم (صلی اللہ علیہ وآلہ وسلم) حدیبیہ اترے قریش میں کھلبلی مچ گئی نبی کریم (صلی اللہ علیہ وآلہ وسلم) نے کسی آدمی کو مکہ بطور ایلچی بھیجنا چاہا آپ نے اس کام کے لیے سیدنا حضرت عمر بن خطاب (رض) کو اپنے پاس بلایا تاکہ انھیں بھیجیں سیدنا حضرت عمر بن خطاب (رض) نے کہا : یا رسول اللہ ! میں قریش پر لعنت بھیجتا ہوں بنی کعب کا کوئی شخص مکہ میں نہیں جو مجھے اذیت پہنچانے پر غصہ ہو آپ سیدنا حضرت عثمان ذوالنورین (رض) کو بھیج دیں چونکہ مکہ میں ان کے رشتہ دار ہیں وہ سفارت اچھی طرح سے کریں گے چنانچہ نبی کریم (صلی اللہ علیہ وآلہ وسلم) نے سیدنا حضرت عثمان ذوالنورین (رض) کو بلایا اور انہی کو قریش کی پاس بھیجا اور فرمایا : ان سے جا کر کہو کہ ہم جنگ کے لیے نہیں آئے ہم تو عمرہ کے لیے آئے ہیں نیز انھیں اسلام کی دعوت دو اور مکہ میں مومن مردوں اور مومن عورتوں کے پاس جاؤ انھیں بشارت دو کہ فتح عنقریب نصیب ہونے والی ہے انھیں خبر دو کہ اللہ تبارک وتعالیٰ عنقریب دین حق کو غالب کر دے گا حتی کہ دین اسلام کا نام لیوا کوئی شخص نہیں چھپے گا ۔ سیدنا حضرت عثمان ذوالنورین (رض) رخصت ہوئے اور مقام بلدح میں قریش کے پاس سے گزرے قریش نے پوچھا کہاں جا رہے ہو ؟ آپ (رض) نے فرمایا : مجھے رسول اللہ (صلی اللہ علیہ وآلہ وسلم) نے تمہارے پاس بھیجا ہے تاکہ میں تمہیں دعوت اسلام دوں اور اللہ تعالیٰ کی طرف بلاؤں نیز میں تمہیں یہ خبر کرنے آیا ہوں کہ ہم لوگ کسی شخص سے جنگ کرنے نہیں آئے ہم تو عمرہ کے لیے آئے ہیں قریش نے کہا : ہم نے تمہاری بات سن لی اپنا کام کرو اتنے میں امان بن سعید بن العاص کھڑا ہوا عثمان (رض) کو خوش آمدید کہا اپنے گھوڑے پر زین درست کی پھر سیدنا حضرت عثمان ذوالنورین (رض) کو گھوڑے پر سوار کیا آپ (صلی اللہ علیہ وآلہ وسلم) کو پناہ دی اور خود ان کے پیچھے سوار ہوگیا حتی کہ مکہ آن پہنچے پھر قریش نے بدیل بن ورقاء خزاعی اور بنی کنانہ کے ایک شخص کو بھیجا پھر عروہ بن مسعود ثقفی آیا (پھر پوری حدیث ذکر کی) پھر عروہ قریش کے پاس آیا اور کہا : محمد اور اس کے ساتھی عمرہ کے لیے آئے ہیں لہٰذا انھیں بیت اللہ میں عمرہ کے لیے جانے دو پھر قریش نے سہیل بن عمرو ، حویطب بن عبدالعزی اور مکرز بن حفص کو صلح کے لیے بھیجا انھوں نے آکر نبی کریم (صلی اللہ علیہ وآلہ وسلم) کو صلح اور معاہدہ کی دعوت دی جب فریقین ایک دوسرے کے قریب ہوئے اور مشرکین کے پاس جو مسلمان تھے وہ بھی صلح کے انتظار میں تھے اسی اثناء میں فریقین میں سے کسی شخص نے دوسرے فریق کو تیر مارا اور یوں جنگ چھڑ گئی فریقین ایک دوسرے پر تیر اور پتھر برسانے لگے چنانچہ فریقین نے ایک دوسرے کے ایلچیوں کو گرفتار کرلیا مسلمانوں نے سہیل بن عمرو اور اس کے ساتھیوں کو پکڑ لیا اور مشرکین نے حضرت عثمان اور ان کے ساتھ جانے والے صحابہ کرام رضوان اللہ تعالیٰ عنہم اجمعین کو پکڑ لیا پھر رسول اللہ (صلی اللہ علیہ وآلہ وسلم) نے صحابہ کرام رضوان اللہ تعالیٰ عنہم اجمعین کو (مرمٹنے کی) بیعت کے لیے بلایا ، ایک منادی نے اعلان کیا کہ جبرائیل امین رسول اللہ (صلی اللہ علیہ وآلہ وسلم) کے پاس آئے ہیں اور آپ کے بیعت کا حکم دیا ہے لہٰذا اللہ کا نام لے کر نکلو اور بیعت کرو مسلمانوں نے آؤ دیکھا نہ تاؤ بیعت کے لیے لپک پڑے جبکہ نبی کریم (صلی اللہ علیہ وآلہ وسلم) ایک درخت کے نیچے کھڑے تھے صحابہ کرام رضوان اللہ تعالیٰ عنہم اجمعین نے اس شرط پر بیعت کی کہ بھاگیں گے نہیں اللہ تعالیٰ نے مشرکین کو مرعوب کیا اور انھوں نے جن مسلمانوں کو گرفتار کرلیا تھا انھیں چھوڑ دیا اور صلح اور معاہدہ کی دعوت دینے لگے ۔ مسلمان کہنے لگے جبکہ وہ حدیبیہ میں تھے سیدنا حضرت عثمان ذوالنورین (رض) کے واپس لوٹنے سے پہلے کہ سیدنا حضرت عثمان ذوالنورین (رض) بیت اللہ کی طرف ہم سے نکل کر جا چکے ہیں انھوں نے بیت اللہ کا طواف کرلیا ہوگا نبی کریم (صلی اللہ علیہ وآلہ وسلم) نے فرمایا : میرا گمان نہیں کہ عثمان نے بیت اللہ کا طواف کیا ہو اور ہم یہاں محصور ہوں صحابہ کرام رضوان اللہ تعالیٰ عنہم اجمعین نے عرض کیا : یارسول اللہ (صلی اللہ علیہ وآلہ وسلم) انھیں طواف کرنے میں کیا ممانعت ہے حالانکہ وہ بیت اللہ تک پہنچ گئے ہیں فرمایا : میرا گمان ہے کہ وہ طواف نہیں کرے گا تاوقتیکہ ہم سب مل کر طواف نہ کریں حتی کہ جب سیدنا حضرت عثمان ذوالنورین (رض) واپس لوٹے ۔ مسلمانوں نے کہا : اے ابو عبداللہ کیا تم نے بیت اللہ کا طواف کرلیا ہے ؟ سیدنا حضرت عثمان ذوالنورین (رض) نے جواب دیا : تم لوگ بدگمانی کا شکار ہوئے ہو قسم اس ذات کی جس کے قبضہ قدرت میں میری جان ہے اگر میں ایک سال تک مکہ میں قیام کئے رہوں رسول اللہ (صلی اللہ علیہ وآلہ وسلم) کے بغیر بیت اللہ کا طواف نہیں کروں گا حالانکہ مجھے قریش نے طواف کی دعوت دی تھی میں نے طواف کرنے سے انکار کردیا مسلمانوں نے کہا : نبی کریم (صلی اللہ علیہ وآلہ وسلم) ہم سے زیادہ علم رکھتے ہیں اور ہم سے زیادہ حسن ظن رکھتے ہیں۔ (رواہ ابن عساکر وابن ابی شیبۃ)