30154 ۔۔۔ خالد بن مخلد ، عبدالرحمن بن عبدالعزیز انصاری ابن شہاب عروہ بن زبیر کہتے ہیں : حدیبیہ کے موقع پر نبی کریم (صلی اللہ علیہ وآلہ وسلم) اٹھارہ سو صحابہ کرام رضوان اللہ تعالیٰ عنہم اجمعین کے ساتھ مدینہ سے نکلے آپ نے خزاعہ سے ناجیہ کو بطور جاسوس روانہ کیا جب آپ غدیر اشطاط پر پہنچے تو آپ کے جاسوس نے یہ اطلاع کی کہ کعب بن لوی اور عامر بن لوی نے آپ کے لیے لشکر عظیم جمع کرلیا ہے وہ آپ کے سفر کی خبر سن چکے ہیں میں نے انھیں اجتماعی طور پر کھاتے پیتے چھوڑا ہے۔ نیز خالد بن ولید بھی مقدمہ الجیش کے ساتھ مقام غمیم میں آن پہنچا ہے نبی کریم (صلی اللہ علیہ وآلہ وسلم) نے فرمایا کیا تم یہ رائے دیتے ہو کہ ہم اپنی راہ پر چلتے جائیں اور جو ہماری راہ میں رکاوٹ ہے اس سے جنگ کریں یا یہ رائے دیتے ہو کہ ہم متبادل راستہ اختیار کرلیں صحابہ کرام رضوان اللہ تعالیٰ عنہم اجمعین نے عرض کیا : یا رسول اللہ (صلی اللہ علیہ وآلہ وسلم) حقیقت میں فیصلہ آپ کا فیصلہ ہے۔ اور قابل عمل رائے آپ ہی کی رائے ہے چنانچہ مسلمانوں نے متبادل راستہ اختیار کیا حتی کہ خالد بن ولید نے مسلمانوں کی غبار بھی نہ پائی حتی کہ آپ (صلی اللہ علیہ وآلہ وسلم) کو لیے ہوئے اونٹنی مقام بلدح پر پہنچی اور بیٹھ گئی آپ نے فرمایا : اونٹنی بیٹھ گئی چنانچہ اونٹنی اٹھنے نہیں پاتی تھی لوگوں نے کہا : اونٹنی بیٹھ گئی آپ نے فرمایا : بخدا ! یہ اس کی عادت نہیں البتہ اسے ہاتھیوں کو روکنے والے نے آگے بڑھنے سے روک دیا ہے ، پھر آپ نے فرمایا : بخدا ! قریش مجھ سے جس ایسے امر کی درخواست کریں گے کہ جس میں شعار اللہ کی تعظیم ہوتی ہو میں ضرور اس کو منظور کروں گا یہ کہہ کر اونٹنی کو کو چا دیا فورا اٹھ کھڑی ہوئی وہاں سے ہٹ کر آپ نے حدیبیہ میں قیام کیا گرمی کا موسم تھا پیاس کی شدت ہوئی پانی قلیل تھا گڑھے میں جس قدر پانی تھا وہ کھینچ لیا گیا صحابہ کرام رضوان اللہ تعالیٰ عنہم اجمعین نے نبی کریم (صلی اللہ علیہ وآلہ وسلم) سے اس کی شکایت کی آپ نے اپنے ترکش سے تیر نکال کردیا اور فرمایا : اسے گڈھے میں گاڑ دو اسی وقت پانی جوش مارنے لگا اور پورا لشکر سیراب ہوگیا ۔ اسی دوران بدیل بن ورقاء خزاعی آپ کے پاس سے گزرا اور اس کے ساتھ اس کی قوم کے چند سوار بھی تھے بدیل نے کہا : اے محمد ! آپ کی قوم (قریش) نے نواحی حدیبیہ میں پانی کے بڑے بڑے چشموں پر آپ کے مقابلہ کے لیے لشکر عظیم جمع کیا ہے کہ آپ کو کسی طرح مکہ میں داخل نہیں ہونے دیں گے ان کے پاس دودھ دینے والی اونٹنیاں ہیں کھاتے پیتے ہیں (یعنی طویل قیام کا ارادہ ہے) نبی کریم (صلی اللہ علیہ وآلہ وسلم) نے فرمایا : اے بدیل ، ہم کسی سے لڑنے کے لیے نہیں آئے ہم تو عمرہ کرنے کے لیے آئے ہیں تاکہ بیت اللہ کا طواف کریں اگر وہ چاہیں تو میں ان کے لیے صلح کی ایک مدت مقرر کر دوں اس مدت میں کوئی ایک دوسرے سے تعرض نہ کرے اور مجھ کو اور عرب کو چھوڑ دیں اگر میں لوگوں پر غالب آجاؤں تو چاہیں تو اس دین میں داخل ہوجائیں اگر بالفرض عرب غالب آجائیں تو تمہاری تمنا پوری ہوگئی ۔ بدیل نے کہا : یہ پیغام میں قریش تک پہنچائے دیتا ہوں حتی کہ جب بدیل قریش کے پاس پہنچا تو انھوں نے پوچھا کہاں سے آرہے ہو ؟ کہا میں تمہارے پاس رسول کریم (صلی اللہ علیہ وآلہ وسلم) کے پاس سے آیا ہوں اگر تم چاہو تو اس کی سنی ہوئی بات تمہیں کہوں چنانچہ قریش کے چند ناہنجار لوگوں نے کہا : ہمیں اس کی کوئی بات سننے کی حاجت نہیں جبکہ سمجھدار اور دانا لوگوں نے کہا نہیں بلکہ ہمیں خبر دو چنانچہ بدیل نے ساری بات سنائی اور مدت صلح کا بھی تذکرہ کیا ۔ کفار قریش میں اس دن عروہ بن مسعود ثقفی بھی تھا اس نے اچھل کر کہا : اے جماعت قریش کیا تم مجھ سے کوئی بدگمانی رکھتے ہو کیا میں تمہارے لیے بمنزلہ باپ کے اور تم میرے لیے بمنزلہ اولاد کے نہیں کیا میں اہل عکاظ کو تمہاری مدد کے لیے دعوت نہیں دے چکا ؟ جب انھوں نے تمہاری مدد سے انکار کیا تو میں اپنی جان اور اپنی اولاد لے کر تمہارے پاس حاضر ہوگیا ؟ قریش نے کہا : بلاشبہ تم نے یہ سب کچھ کیا عروہ نے کہا : لہٰذا یہ بدیل جو پیغام لایا ہے اور اسے رسول اللہ (صلی اللہ علیہ وآلہ وسلم) نے تمہارے اوپر پیش کیا ہے اسے بغیر لیت ولعل کے قبول کرو مجھے محمد (صلی اللہ علیہ وآلہ وسلم) کے پاس بھیجو تاکہ میں اس سے مل کر اس معاملہ میں گفتگو کروں قریش نے عروہ کو اجازت دی اور وہ حدیبیہ میں رسول اللہ (صلی اللہ علیہ وآلہ وسلم) کے پاس حاضر ہوا اور کہا : اے محمد یہ تمہاری قوم کعب بن لوی اور عامر بن لوی ہے یہ دودھ دینے والی اونٹنیوں کو لے کر آئے ہیں اور قسمیں کھا رہے ہیں کہ آپ کو بیت اللہ میں نہیں جانے دیں گے حتی کہ تم ان کا صفایا نہ کر دوں آپ کو دو باتوں کا اختیار ہے (1) یہ کہ تم اپنی قوم کو استحصال کر دو حتی کہ قوم کے کسی فرد کو باقی نہ چھوڑو (2) اور یہ کہ آپ سلامتی میں رہیں اور قوم کو بھی سلامت رکھیں میں مختلف قوموں کے لوگ تمہارے ساتھ دیکھ رہا ہوں میں ان کے ناموں سے بھی واقف نہیں ہوں اور نہ ہی ان کے چہرے دیکھے ہیں سیدنا حضرت ابوبکر صدیق (رض) نے غصہ میں عروہ کو گالی دی کہ تو لات کی شرمگاہ چومیں ، کیا ہم نبی کریم (صلی اللہ علیہ وآلہ وسلم) کو چھوڑ دیں گے عروہ نے کہا : خدا کی قسم اگر تمہارا مجھ پر احسان نہ ہوتا جس کا میں بدلہ نہیں چکا سکا میں تمہیں ضرور جواب دیتا کسی وقت عروہ کو دیت میں سیدنا حضرت ابوبکر صدیق (رض) نے اس کی مدد کی تھی حضرت مغیرہ بن شعبہ (رض) رسول اللہ (صلی اللہ علیہ وآلہ وسلم) کے پاس کھڑے تھے عروہ نبی کریم (صلی اللہ علیہ وآلہ وسلم) کے ساتھ گفتگو کررہا تھا جب بھی کوئی بات کرتا تو نبی کریم (صلی اللہ علیہ وآلہ وسلم) کی داڑھی مبارک کو ہاتھ لگاتا مغیرہ (رض) کو دیکھ کر یہ حالت سخت ناگوار گزری اور نیزے سے عروہ کا ہاتھ پیچھے دھکیل دیا عروہ نے کہا : یہ کون ہے لوگوں نے جواب دیا : یہ مغیرہ بن شعبہ ہیں عروہ نے کہا : اے دھوکا باز یہ تم ہو کیا میں نے تیری دھوکا دہی کو عکاظ کے بازار میں نہیں صاف کیا نبی کریم (صلی اللہ علیہ وآلہ وسلم) نے عروہ سے وہی بات کہی جو بدیل سے کہی تھی ۔ عروہ واپس اپنی قوم کی طرف چل دیا اور آکر کہا : اے جماعت قریش میں بڑے بڑے بادشاہوں کے پاس گیا ہوں شام میں قیصر کے پاس گیا ہوں حبشہ میں نجاشی کے پاس گیا ہوں اور عراق میں کسری کے پاس گیا ہوں خدا کی قسم میں نے ایسا عظیم بادشاہ کوئی نہیں دیکھا چنانچہ محمد (صلی اللہ علیہ وآلہ وسلم) کے ساتھیوں میں کوئی شخص ایسا نہیں جو اس کی طرف نظر اٹھا کر دیکھے یا اس کے سامنے کوئی آواز بلند کرے محمد کے وضو کے غسالہ پر اس کے ساتھی مرتے ہیں لہٰذا بدیل تمہارے پاس جو پیغام لایا ہے اسے بغیر کم وکاست کے قبول کرلو بلاشبہ اسی میں اچھائی ہے قریش نے عروہ سے کہا تم بیٹھ جاؤ پھر قریش نے بنی حارث بن مناف کے ایک شخص کو بلایا اسے حلیس کے نام سے پکارا جاتا تھا اس سے کہا : تم جاؤ اور حالات کا جائز لے کر آؤ چنانچہ حلیس چل پڑا نبی کریم (صلی اللہ علیہ وآلہ وسلم) نے جب حلیس کو دیکھا فرمایا : یہ حلیس ہے اور اس کا تعلق ایسی قوم سے ہے جو بیت کی نذر کیے ہوئے جانوروں کی تعظیم کرتی ہے ، لہٰذا اس کی راہ میں جانوروں کو کھڑا کر دو ۔ اس کے بعد حلیس کے متعلق اختلاف ہے ابن شہاب کی روایت ہے کہ بعض محدثین کہتے ہیں کہ نبی کریم (صلی اللہ علیہ وآلہ وسلم) نے حلیس سے وہی بات کہی ، جو عروہ اور بدیل سے کہی تھی بعض کہتے ہیں کہ حلیس نے جونہی ہدی کے جانور دیکھے واپس لوٹ گیا اور قریش سے کہا : میں نے ایسی چیز دیکھی ہے کہ یہ لوگ صرف عمرہ کے لیے آئے ہیں پس ان کی راہوں میں رکاوٹ بننا بدبختی سے کم نہیں ہوگا قریش نے اس سے بھی کہا : تو بیٹھ جا پھر قریش نے مکرز بن حفص بن احنف جو کہ بنی عامر بن لوی سے تھا بھیجا جب نبی کریم (صلی اللہ علیہ وآلہ وسلم) نے اسے دیکھا فرمایا : یہ فاجر شخص ہے اور ایک ہی آنکھ سے دیکھتا ہے آپ نے اس سے بھی وہی بات کہی جو بدیل عروہ اور اس کے ساتھیوں سے قبل ازیں کہی تھی مکرز نے قریش کو خبر کی اب کی بار قریش نے بنی عامر بن لوی سے سہیل بن عمرو کو بھیجا تاکہ وہی صلح کا معاملہ طے کرے ، اس نے کہا : مجھے قریش نے آپ کے پاس بھیجا ہے تاکہ میں صلح نامہ لکھو جس پر میں اور آپ راضی ہوں نبی کریم (صلی اللہ علیہ وآلہ وسلم) نے فرمایا : لکھو ! ” بسم اللہ الرحمن الرحیم سہیل نے کہا : میں اللہ اور رحمن کو نہیں جانتا البتہ وہی لفظ لکھو جو ہم لکھا کرتے تھے یعنی ” باسمک اللہم “ مسلمانوں کو اس پر غصہ آیا اور کہا : ہم اس وقت تک صلح نامہ نہیں لکھتے جب تک تم رحمن اور رحیم کا اقراء نہ کرلو سہیل نے کہا میں بھی صلح نامہ نہیں لکھوں گا حتی کہ میں یونہی واپس چلا جاؤں گا ۔ نبی کریم (صلی اللہ علیہ وآلہ وسلم) نے کاتب سے فرمایا : لکھو : باسمک اللہم “ یہ وہ صلح نامہ ہے جو محمد رسول اللہ (صلی اللہ علیہ وآلہ وسلم) نے کہا : سہیل نے کہا میں اس کا اقرار نہیں کرتا اگر میں آپ کو اللہ کا رسول مانتا آپ کی مخالفت نہ کرتا آپ کی نافرمانی نہ کرتا البتہ محمد بن عبداللہ لکھو مسلمانوں کو اس پر بھی گہرا غم وغصہ ہوا ۔ آپ نے کاتب سے فرمایا : لکھو : محمد بن عبداللہ اور سہیل بن عمرو اتنے میں سیدنا حضرت عمر بن خطاب (رض) کھڑے ہوئے اور فرمایا : یا رسول اللہ ! کیا ہم حق پر نہیں ہیں ؟ کیا ہمارا دشمن باطل پر نہیں ہے ؟ فرمایا : جی ہاں عرض کیا : پھر ہم کیوں اپنے دین کے معاملہ میں پستی کا مظاہرہ کریں ، فرمایا : میں اللہ کا رسول ہوں میں ہرگز اللہ تعالیٰ کی نافرمانی نہیں کرتا اور اللہ تعالیٰ مجھے ضائع نہیں کرے گا جبکہ سیدنا حضرت ابوبکر صدیق (رض) ایک طرف کھڑے تھے سیدنا حضرت عمر بن خطاب (رض) ، سیدنا حضرت ابوبکر صدیق (رض) کے پاس آئے اور کہا : اے ابوبکر (رض) جواب دیا : جی ہاں سیدنا حضرت عمر بن خطاب (رض) نے کہا : کیا ہم حق پر نہیں ہیں کیا ہمارا دشمن باطل پر نہیں ہے ؟ انھوں نے بھی جواب دیا ہاں کیا : پھر ہم اپنے دین کے معاملہ میں اتنی پستی کا مظاہرہ کیوں کریں ؟ فرمایا : اے عمر ! اپنی رائے کو چھوڑ دو چونکہ نبی کریم (صلی اللہ علیہ وآلہ وسلم) اللہ کے رسول ہیں ، اللہ تعالیٰ انھیں ہرگز نقصان نہیں پہنچائے گا اور نبی کریم (صلی اللہ علیہ وآلہ وسلم) بھی اللہ تبارک وتعالیٰ کی نافرمانی نہیں کرتے ۔ صلح نامے کی شرائط میں یہ مندرجات تھے یہ ہمارا کوئی شخص جو تمہارے دین پر ہو اور وہ تمہارے پاس آجائے تم اسے واپس کرنے کے مجاز ہو گے اور تمہارا جو آدمی ہمارے پاس آجائے گا ہم اسے واپس کریں گے آپ نے فرمایا : رہی یہ بات کہ ہمارا کوئی آدمی تمہارے پاس چلا جائے سو ہمیں اس کے واپس ہونے کی کوئی ضرورت نہیں البتہ پہلی شرط ہمیں منظور رہے ۔ اسی اثناء میں لوگ یہ شرط سن کر اس پر گفتگو کر رہے تھے اتنے میں حضرت ابو جندل بن سہیل بن عمرو بیڑیوں میں جکڑے ہوئے ہاتھ پاؤں کے بل گھسٹتے ہوئے نمودار ہوئے جبکہ ہاتھوں میں تلوار بھی اٹھا رکھی تھی جب سہیل نے ان کا اوپر اٹھایا کیا دیکھتا ہے کہ اس کا اپنا بیٹا ہے سہیل نے کہا : یہ ہمارے صلح نامہ کا پہلا فیصلہ ہوگا لہٰذا آپ اسے واپس کردیں نبی کریم (صلی اللہ علیہ وآلہ وسلم) نے فرمایا : اے سہیل ہم نے صلح نامہ ابھی مکمل نہیں کیا ہے سہیل نے کہا : میں کسی بات پر آپ کے ساتھ صلح نہیں کرتا حتی کہ تم لوگ اسے واپس نہ کرو نبی کریم (صلی اللہ علیہ وآلہ وسلم) نے فرمایا : ٹھیک ہے اسے واپس لے جاؤ، ابو جندل (رض) نے نہایت حسرت سے مسلمانوں سے کہا : اے مسلمانو ! کیا مجھے مشرکین کے پاس واپس لوٹایا جائے گا یوں مشرکین مجھے میرے دین میں سخت آزمائشوں میں مبتلا کردیں گے حضرت عمر (رض) ابو جندل (رض) کے ساتھ چمٹ گئے جبکہ سہیل نے ابو جندل (رض) کا ہاتھ پکڑ لیا اور اپنی طرف کھینچنے لگا سیدنا حضرت عمر بن خطاب (رض) فرما رہے تھے یہ بھی تو ایک آدمی ہے اور تمہارے پاس تلوار ہے چنانچہ اس شرط کی پاداش میں مشرکین سے جو شخص بھی مسلمانوں کے پاس آتا آپ اسے واپس لوٹا دیتے یو واپس جانے والوں کی اچھی خاصی جماعت اکٹھی ہوگئی ان میں حضرت ابو بصیرہ (رض) بھی تھے انھوں نے ساحل سمندر کے قریب ایک جگہ اقامت اختیار کرلی اور قریش کا جو قافلہ بھی شام تجارت کے لیے جاتا اسے لوٹ لیتے قریش نے تنگ آکر نبی کریم (صلی اللہ علیہ وآلہ وسلم) کو پیغام بھیجا کہ آپ جن لوگوں کو واپس کرتے رہے ہیں انھوں نے ہماری ناک میں دم کردیا ہے لہٰذا انھیں اپنے پاس بلوا لو اور یوں اس کڑی شرط کا خاتمہ ہوا۔ ایک شرط یہ بھی تھی کہ اس سال آپ لوگ واپس چلے جائیں اور آئندہ سال عمرہ کے لیے آئیں اور ہدی کے جانور بھی لاسکتے ہیں نیز عمرہ کی غرض کے لیے آپ کو صرف تین دن قیام کرنے کی اجازت ہوگی اس کے بعد نبی کریم (صلی اللہ علیہ وآلہ وسلم) نے تین مرتبہ لوگوں کو حکم دیا کہ اٹھو جانوروں کو ذبح کرو سر منڈواؤ اور احرام سے حلال ہوجاؤ مگر بیت اللہ اور عمرہ کے شوق میں مسلمانوں میں سے کسی فرد نے حرکت تک بھی نہ کی آپ (صلی اللہ علیہ وآلہ وسلم) یہ حالت دیکھ کر حضرت ام سلمہ (رض) کے پاس گئے اور ان سے کہا : اے ام سلمہ ! لوگوں کو کیا ہوا جو میں انھیں تین مرتبہ کہہ چکا ہوں کہ جانور ذبح کرو ، سر منڈواؤ اور حلال ہوجاؤ مگر کسی نے حرکت تک نہیں کی ۔ حضرت ام سلمہ (رض) نے کہا : یا رسول اللہ ! پہلے آپ خود جانور ذبح کریں حجام کو بلا کر سر منڈوائیں اور حلال ہوجائیں آپ کی دیکھا دیکھی لوگ بھی ایسا کرنے پر مجبور ہوں گے ، چنانچہ آپ (صلی اللہ علیہ وآلہ وسلم) نے ایسا ہی کیا پھر صحابہ کرام رضوان اللہ تعالیٰ عنہم اجمعین آپ کو دیکھ کر کود پڑے جانور ذبح کرنے لگ اور ایک دوسرے کے سر بھی مونڈنے لگے حتی کہ شدید ازدھام ہوگیا ابن شہاب کہتے ہیں ، نبی کریم (صلی اللہ علیہ وآلہ وسلم) اور صحابہ کرام رضوان اللہ تعالیٰ عنہم اجمعین ستر اونٹ قربانی کے لیے لائے تھے پھر خیبر سے ملنے والا سارا مال غنیمت آپ (صلی اللہ علیہ وآلہ وسلم) نے ان لوگوں میں تقسیم کیا جو صلح حدیبیہ میں شامل تھے مال کے اٹھارہ حصے کیے اور ہر سو آدمیوں کو ایک ایک حصہ دیا ۔ (رواہ ابن ابی شیبۃ)