30234 ۔۔۔ حضرت انس بن مالک (رض) کی روایت ہے کہ ہوازن حنین کے موقع پر اپنے بچے عورتیں اونٹ اور بھیڑ بکریاں لے آئے اور صفیں بنا ڈالیں انھوں نے ایسا اس لیے کیا تاکہ رسول اللہ (صلی اللہ علیہ وآلہ وسلم) کو ان کی کثرت معلوم ہو جب جنگ ہوئی تو مسلمانوں کو عارضی طور پر پسپا ہونا پڑا جیسا کہ اللہ تعالیٰ نے فرمایا ہے رسول اللہ (صلی اللہ علیہ وآلہ وسلم) نے فرمایا نبی کریم (صلی اللہ علیہ وآلہ وسلم) اے اللہ کے بندو ! میں اللہ کا بندہ اور اس کا رسول ہوں ۔ پھر فرمایا : اے مہاجرین کی جماعت ! میں اللہ کا بندہ اور اس کا رسول ہوں ۔ چنانچہ اللہ تبارک وتعالیٰ نے مشرکین کو شکست دی کوئی تلوار نہیں چلائی اور نہ ہی کوئی نیزہ چلایا اس دن رسول اللہ (صلی اللہ علیہ وآلہ وسلم) نے فرمایا : جو شخص کسی کافر کو قتل کرے گا کافر کا سازو و سامان قاتل کے لیے ہوگا چنانچہ ابو طلحہ (رض) نے بیس کافروں کا قتل کیا اور سب کا سازوسامان انھوں نے لے لیا ابو قتادہ (رض) نے عرض کیا : یا رسول اللہ ! میں نے ایک شخص کے کاندھے پر کاری ضرب لگائی ہے اس نے زرہ پہن رکھی تھی زرہ کٹ گئی تھی تاہم میں اسے اسی حالت میں چھوڑ کر آگے بڑھ گیا تھا آپ نے فرمایا : دیکھو کس نے اس کا سازوسامان لیا ہے ایک شخص کھڑا ہوا اور کہا : میں ن ے اس کا سازوسامان لیا ہے آپ قتادہ کو اور کچھ دے دیں اور یہ سامان مجھی کو لینے دیں چنانچہ رسول اللہ (صلی اللہ علیہ وآلہ وسلم) سے جو کچھ مانگا جاتا آپ عطا کردیتے تھے یا خاموش ہوجاتے تھے آپ اس مرتبہ خاموش رہے اتنے میں سیدنا حضرت عمر بن خطاب (رض) نے کہا : بخدا ! ایسا نہیں کہ اللہ تعالیٰ ایک شیر کے مال کو چھین کر دوسرے شیر کو دے دے رسول اللہ (صلی اللہ علیہ وآلہ وسلم) ہنس پڑے اور فرمایا : عمر نے سچ کہا حضرت ابوطلحہ (رض) ام سلیم (رض) سے ملے اور ام سلیم (رض) کے پاس خنجر تھا ابو طلحہ نے پوچھا : اے ام سلیم تمہارے پاس یہ کیا ہے ؟ ام سلیم (رض) نے کہا : میں چاہتی ہوں کہ اگر کوئی مشرک میرے پاس آیا وت اس سے میں اسے زخمی کروں گی اور اس کے پیٹ میں کچوکے لگاؤں گی ابو طلحہ (رض) نے عرض کی یا رسول اللہ آپ نے ام سلیم (رض) کو نہیں سنا وہ کیا کہتی ہے ؟ ام سلیم (رض) بولیں : یا رسول اللہ (صلی اللہ علیہ وآلہ وسلم) ! طلقاء میں سے ہمارے بعد جو شخص ہوگا میں اسے قتل کروں گی اس پر آپ نے فرمایا : اللہ تبارک وتعالیٰ نے کفایت کردی ہے اور ہمارے حق میں جنگ کا اچھا نتیجہ دیا ہے۔ (رواہ ابن ابی شیبۃ)