30265 ۔۔۔ عروہ روایت کی ہے کہ حضرت اسامہ بن زید (رض) نے جہاد کے لیے تیاری کی اور سازوسامان پہلی منزل مقام جرف میں منتقل کردیا جرف پہنچ کر حضرت اسامہ بن زید (رض) نے قیام کرلیا چونکہ انھیں نبی کریم (صلی اللہ علیہ وآلہ وسلم) کے بیمار ہونے کی خبر پہنچ گئی تھی رسول اللہ (صلی اللہ علیہ وآلہ وسلم) نے حضرت اسامہ بن زید (رض) کو لشکر کا امیر مقرر کیا تھا لشکر میں مہاجرین بھی تھے ، حتی کہ عمر بن خطاب (رض) بھی شامل تھے رسول اللہ (صلی اللہ علیہ وآلہ وسلم) نے حکم دیا تھا کہ موتہ پر جا کر چڑھائی کر دو اور فلسطین کی جانب جہاں زید بن حارثہ (رض) کو شہید کیا گیا وہاں پر بھی حملہ کرو لوگ جوق در جوق آتے اور آپ سے ملاقات کرتے اور آپ کی صحت یابی کے لیے دعائیں کرتے رخصت ہوتے رہے ، ، بالآخر آپ نے اسامہ (رض) کو بلا کر فرمایا : اللہ تعالیٰ کی برکت اور مدد پر صبح یہاں سے کوچ کر جاؤ میں نے تمہیں جہاں حملہ آور ہونے کا حکم دیا ہے وہیں جا کر حملہ کرو حضرت اسامہ (رض) نے عرض کی : آپ کو صبح کے وقت افاقہ ہوا ہے مجھے امید ہے کہ اللہ تعالیٰ آپ کو شفا عطا فرمائے گا آپ مجھے اجازت مرحمت فرمائیں کہ میں رک جاؤں تاوقتیکہ کہ اللہ تبارک وتعالیٰ آپ کو شفایاب کر دے اگر اسی حالت میں میں چلا گیا میرے دل میں ہمیشہ ہمیشہ کے لیے تردد رہے گا میں اچھا نہیں سمجھتا کہ آپ کے متعلق پھر لوگوں سے پوچھتا پھروں رسول اللہ (صلی اللہ علیہ وآلہ وسلم) خاموش رہے اور کوئی جواب نہ دیا اور اٹھ کر حضرت عائشۃ صدیقہ (رض) کے گھر میں تشریف لے گئے ۔ (رواہ ابن عساکر)