٤٠٤٦٧۔۔۔ پنگوڑے میں صرف تین بچے بولے ہیں : عیسیٰ (علیہ السلام) ، بنی اسرائیل میں ایک جریج نامی تھا وہ نماز پڑھ رہا تھا تو اس کی ماں نے اسے بلایا تو اس نے دل میں کہا : میں نماز پڑھوں یا ماں کو جواب دوں ! تو اس کی ماں نے کہا : اے اللہ ! رنڈیوں کا منہ دکھائے بغیر اسے موت نہ دینا، ایک دفعہ جریج اپنے عبادت خانہ میں تھا کہ اس کے پاس ایک عورت آکر خواہش کرنے لگی تو اس نے انکار کردیا پھر وہ ایک چرواہے کے پاس گئی اور اسے اپنے آپ پر قدرت دی جس کے نتیجہ میں اس نے ایک لڑکا جنا، تو کہنے لگی : یہ جریج سے ہے تو لوگوں نے آکر اس کا عبادت خانہ توڑدیا اور اسے نیچے اتار کر گالیاں دینے لگے، اس نے وضو کیا اور نماز پڑھ کر بچہ کے پاس آیا اور کہا : لڑکے تیرا باپ کون ہے ؟ اس نے کہا : چرواہا، لوگوں نے کہا : ہم تمہارا عبادت خانہ سونے سے بنائیں گے اس نے کہا : نہیں صرف مٹی سے بنادو (تیسرابچہ) ایک دفعہ بنی اسرائیل کی ایک عورت اپنے بچہ کو دودھ بلارہی تھی تو اس کے پاس ایک عمدہ سواری والا گزراتو وہ عورت کہنے لگی : اے اللہ ! میرے بیٹے کو اس جیسا بنادے تو اس نے پستان ترک کرکے سوار کو دیکھ کر کہا : اے اللہ ! مجھے اس جیسا نہ بنا، پھر پستان چوسنے لگا پھر اس کی ماں کے پاس ایک ہاندی گذری تو وہ کہنے لگی : اے اللہ ! میرے بیٹے کو اس جیسا نہ بناتو اس نے پستان ترک کرکے کہا : اے اللہ ! مجھے اس جیسا بناتو وہ کہنے لگی : ایسا کیوں ؟ تو وہ بولا : سوار ایک ظالم تھا اور یہ باندی ایسی ہے جس کے بارے میں لوگ کہتے ہیں : کہ اس نے چوری کی زنا کیا جب کہ اس نے کچھ بھی نہیں کیا۔ مسنداحمد، بیہقی عن ابوہریرہ