٤٠٤٧٣۔۔۔ اسی طرح قتادہ سے وہ مجاہد سے وہ حضرت ابن عباس (رض) سے روایت کرتے ہیں : فرمایا : مجھ سے ابی بن کعب (رض) نے بیان کیا فرماتے ہیں : میں نے رسول اللہ (صلی اللہ علیہ وآلہ وسلم) کو فرماتے سنا : کہ جس رات مجھے معراج ہوا، میں نے ایک اچھی خوشبو محسوس کی میں نے کہا : جبرائیل ! یہ کیسی خوشبو ہے ؟ تو انھوں نے کہا : کنگھی کرانے والی عورت اس کے بیٹوں اور اس کے خاوند کی قبر کی خوشبو ہے جس کا آغاز اس طرح ہوا کہ خضر بنی اسرائیل کے شرفاء سے تعلق رکھتے تھے ان کا گزر ایک راہب پر اس کے عبادت خانہ سے ہوتا تھا وہ باہر جھانکتا اور انھیں اسلام کی تعلیم دیتا اس نے ان سے یہ عہد لیا کہ وہ اس کا کسی کو نہ بتائیں پھر ان کے والد نے ایک عورت سے ان کی شادی کردی انھوں نے اس وعدہ پر اسے اسلام کی تعلیم دی کہ کسی کو ان کا نہیں بتائے گی وہ عورتوں کے زیادہ قریب نہ ہوتے تھے اس لیے اسے طلاق دے دی پھر ان کے والد نے دوسری عورت سے ان کی شادی کردی اسے بھی اس شرط پر کہ وہ ان کا کسی کو نہیں بتائے گی اسلام کی تعلیم دی بعد میں اسے بھی طلاق دے دی تو ایک نے ان کا راز فاش کیا اور دوسری نے پوشیدہ رکھا راز فاش ہونے کے بعد وہ گھبرا کربھاگ نکلے اور ایک جزیرہ جو سمندر میں تھا اس میں فروکش ہوئے، وہاں انھیں دو آدمیوں نے دیکھا تو ان میں سے ایک نے ان کا بھید چھپایا اور دوسرے نے ظاہر کردیا دیکھنے والے سے کہا گیا : تمہارے ساتھ اور کس نے دیکھا ہے ؟ اور ان کے دین میں یہ قانون تھا کہ جو جھوٹ بولتا اسے قتل کردیاجاتا تو جب اس سے پوچھا گیا تو اس نے پوشیدہ رکھا یوں بتانے والا جھوٹا پڑگیا جس کی پاداش میں بتانے والے کو قتل کردیا گیا۔ بعد میں راز چھپانے والے کی راز چھپانے والی سے شادی ہوگئی ایک دفعہ وہ فرعون کی بیٹی کی کنگھی کررہی تھی کہ اس کے ہاتھ سے کنگھی گری تو اس نے کہا : فرعون موا، تو بچی نے اپنے والد کو بتادیا تو فرعون نے اسے اس کے دونوں بیٹوں اور اس کے خاوند کو بلا بھیجا اور انھیں ان کے دین سے ہٹانے کا ارادہ کیا انھوں نے انکار کیا فرعون نے کہا : میں تمہیں قتل کرنے والا ہوں، انھوں نے کہا : ہم چاہتے ہیں کہ ہمیں قتل کرنے کے بعد ایک قبر میں دفن کردیں تو انھیں قتل کرنے کے بعد ایک قبر میں دفن کردیا نبی (صلی اللہ علیہ وآلہ وسلم) نے فرمایا : اگرچہ میں جنت میں داخل ہوچکا تھا مگر میں نے اس سے اچھی خوشبو نہیں سونگھی۔ ابن ماجۃ ابن عساکر