42495: ۔۔۔ مومن بندہ جب دنیا سے ناتا توڑنے اور آخرت کا رخ کرنے لگتا ہے تو آسمان سے سفید رو فرشتے اس کے پاس اترتے ہیں گویا ان کے چہرے آٖتاب ہیں، ان کے پاس جنت کے کفن اور جنت کی خوشبو ہوتی ہے پھر تاحد نظر اس کے پاس بیٹھ جاتے ہیں۔ اس کے بعد ملک الموت آ کر اس کے سرہانے بیٹھ جاتا ہے اور کہتا ہے اے پاک روح ! اللہ تعالیٰ کی مغفرت اور رضا مندی کی طرف نکل ! تو وہ روح ایسے بہتے ہوئے نکلتی ہے جیسے مشکیزے سے قطرہ بہتا ہے تو وہ فرشتہ اسے قبض کرلیتا ہے۔ پھر اس سے اس (جنتی) کفن اور خوشبو میں رکھ لیتے ہیں، اور اس سے ایسی مہک آیت ہے جیسے کسی زمین پر مشک مہک رہی ہو، پھر وہ اسے لے کر پرواز کرتے ہیں تو فرشتوں کی جس جماعت کے پاس سے گزرتے ہیں ؟ تو وہ کہتے ہیں : یہ پاک روح کون ہے ؟ تو وہ کہتے ہیں : فلاں کا بیٹا فلاں ہے۔ اور دنیا کے جس نام سے اسے یاد کیا جاتا تھا اس کے اس اس کا نام لیتے ہیں یہاں تک کہ آسمان دنیا تک جا پہنچتے ہیں، اس کے لیے دروازے کھلواتے ہیں تو وہ اس کے لیے کھول دیا جاتا ہے تو ہر آسمان کے مقرب فرشتے دوسرے آسمان تک اسے الوداع اور رخصت کرتے ہیں اور ساتویں آسمان تک یہی سلسلہ جاری رہتا ہے، تو اللہ تعالیٰ فرماتے ہیں میرے ئ بندے کا نامہ اعمال علیین میں لکھ دو اور میرے بندے (کی روح) کو زمین کی طرف لوٹا دو کیونکہ میں نے اسی سے انھیں پیدا کیا اور اسی میں انھیں لوٹاؤں گا اور اسی سے دوبارہ انھیں نکالوں گا، چنانچہ اس کی روح لوٹا دی جاتی ہے۔ پھر اس کے پاس دو فرشتے ہوتے ہیں اسے بٹھاتے اور اسے کہتے ہیں : تیرا رب کون ہے ؟ وہ کہتا ہے : میرا رب اللہ تعالیٰ ہے، پھر وہ اسے کہتے ہیں : تیرا دین کیا ہے ؟ وہ کہتا ہے میرا دین اسلام ہے، وہ کہتے ہیں جو شخص تمہاری طرف مبعوث کیا گیا وہ کون ہے ؟ تو وہ کہتا ہے وہ اللہ تعالیٰ کے رسول ہیں، پھر وہ اس سے کہتے ہیں@ تجھے کیسے پتہ چلا ؟ وہ جواب میں کہتا ہے : میں نے اللہ تعالیٰ کی کتاب پڑھی اس پر ایمان لایا اور اس کی تصدیق کی ، تو آسمان سے ایک آواز دینے والا آواز دیتا ہے کہ اس نے سچ کہا : اس کے لیے جنت کا بچھونا بچھا دو اور اسے جنت کا لباس پہنا دو ، اور جنت کی طرف اس کے لیے ایک دروازہ کھول دو ، جہاں سے اس کی طرف جنت کی تازہ ہوا اور خوشبو آنا شروع ہوجاتی ہے اور اس کی قبر تاحد نگاہ کشادہ ہوجاتی ہے۔
پھر اس کے پاس ایک خوش شکل، خوش لباس اور پاکیزہ خوشبو والا ایک شخص آتا ہے وہ اس سے کہتا ہے : تجھے جس چیز سے خوشی ہو اس کی خوشخبری ہو یہ تیرا وہی دن ہے جس کا تجھ سے وعدہ کیا جاتا تھا، وہ اس سے پوچھے گا تو کون ہے ؟ تجھ جیسیس صورت بھلائی ہی لے کر آتی ہے، وہ جواب میں کہے گا : میں تیرا نیک عمل ہوں تو وہ شخص کہے گا، اے میرے رب ! قیامت برپا فرما، اے میرے رب ! قیامت قائم فرما، تاکہ اپنے اہل و مال کی طرف لوٹ جاؤں۔
اور کافر بندہ جب دنیا سے جانے اور آخرت کا رخ کرنے لگتا ہے تو اس کے پاس آسمان سے کالے چہروں والے فرشتے آتے ہیں ان کے پاس ٹاٹ ہوتے ہیں پھر وہ اس کے پاس تاحد نگاہ بیٹھ جاتے ہیں، پھر ملک الموت آتا ہے اور اس کے سرہانے بیٹھ جاتا اور اسے کہتا ہے : اے خبیث روح اللہ تعالیٰ کی ناراضگی اور غضب کی طرف نکل ! اور اس کے جسم کے دو ٹکڑے کردیے جاتے ہیں، پھر وہ اسے ایسے کھینچ لیتا ہے جیسے گیلی روئی سے سیخ کو کھینچ لیا جاتا ہے، چنانچہ وہ اسے قبض کرلیتا ہے اور جب اسے قبض کرلیتا ہے تو پلک جھپکنے کی مقدار بھی اسے نہیں چھوڑتا، یہاں تک کہ اسے ان ٹاٹوں میں ڈال لیتے ہیں، اور اسے لے کر پرواز کرتے ہیں، اور فرشتوں کی جس جماعت کے پاس سے گزرتے ہیں، تو وہ کہتے ہیں یہ کیا خبیث روح ہے، تو وہ کہتے ہیں یہ فلاں کا بیٹا فلاں ہے اور دنیا میں جس نام سے اسے پکارا جاتا تھا سب سے برے نام سے پکارتے ہیں یہاں تک کہ اسے ساتویں آسمان پر لے جاتے ہیں اس کے لیے دروازہ کھلواتے ہیں (لیکن) کھولا نہیں جاتا، پھر یہ آیت پڑھی۔ ان کے لیے آسمان کے دروازے نہیں کھولے جاتے۔ پھر اللہ تعالیٰ فرماتے ہیں : اس کا اعمال نامہ سجین میں لکھ دو ، جو نچلی زمین میں ہے، پھر اس کی روح کو پھینک دیا جاتا ہے، چنانچہ اس کی روح اس کے بدن کی طرف آجاتی ہے پھر اس کے پاس دو فرشتے آتے ہیں اسے بٹھا کر کہتے ہیں : تیرا رب کون ہے ؟ وہ کہتا ہے : ہائے ہائے ! مجھے علم نہیں، پھر اس سے پوچھتے ہیں : تیرا دین کیا ہے ؟ وہ کہتا ہے : ہائے ہائے ! مجھے کچھ پتہ نہیں، وہ دونوں اس سے کہتے ہیں : وہ شخص جو تم میں بھیجا گیا کون ہے ؟ وہ کہتا ہے ہائے ہائے مجھے پتہ نہین، اتنے میں آسمان سے ایک منادی ندا کرتا ہے کہ میرے بندہ نے جھوٹ بولا، اس کے لیے جہنم کا بچھونا بچھا دو ، اور جہنم کی طرف دروازہ کھول دو ، جہاں سے اس کی طرف جہنم کی گرم ہوا آتی ہے اور اس کی قبر اتنی تنگ کردی جاتی ہے کہ اس کی پسلیاں آپس میں گھس جاتی ہیں۔
پھر اس کے پاس بری شکل، خراب کپڑوں اور بدبو والا ایک شخص اتا ہے اور کہتا ہے : جس سے تجھے ناگواری ہو اس کی بشارت لے، یہ تیرا وہ دن ہے جس کا تجھ سے وعدہ کیا جاتا تھا، وہ شخص کہے گا : تو کون ہے ؟ اور تیرا چہرہ تو ایسا ہے کہ جس سے خیر کی توقع نہیں، وہ کہے گا میں تیرا برا عمل ہوں تو وہ شخص کہے گا : اے میرے رب ! قیامت قائم نہ فرمانا۔ مسند احمد، ابو داود، ابن خزیمہ، حاکم، بیہقی فی الشعب والضیاء عن البراء۔