4664: ۔۔ حضرت ابن عباس (رض) سے مروی ہے کہ مجھے حضرت عمر بن خطاب (رض) نے فرمایا : جب رسول اکرم (صلی اللہ علیہ وآلہ وسلم) نے اپنی بیویوں سے جدائی اختیار کرلی تو میں مسجد نبوی میں داخل ہوا تو لوگ کنکریوں کو ہاتھ میں لیے بات کر رہے تھے کہ حضور (صلی اللہ علیہ وآلہ وسلم) نے اپنی عورتوں کو طلاق دیدی ہے۔ یہ پردہ کا حکم نازل ہونے سے قبل کی بات تھی۔ چنانچہ میں دل میں تہیہ کیا کہ میں ان عورتوں کو آج سبق سکھاؤں گا۔ میں عائشہ (رض) کے پاس گیا اور کہا اے بنت ابی بکر ! تمہاری یہ ہمت ہوگئی کہ تم رسول اللہ (صلی اللہ علیہ وآلہ وسلم) کو تکلیف پہنچانے لگی ہو۔ عائشہ بولی : اے ابن خطاب میرا اور تمہارا کیا واسطہ ! تم جا کر اپنی بیٹی کو کہو۔ چنانچہ میں (اپنی بیٹی) حفصہ کے پاس آیا اور بولا اے حفصہ ! تمہاری یہ ہمت ہوگئی ہے کہ تم رسول اللہ (صلی اللہ علیہ وآلہ وسلم) کو تکلیف پہنچاؤ۔ اللہ کی قسم مجھے علم ہوا کہ رسول اللہ (صلی اللہ علیہ وآلہ وسلم) تم سے محبت نہیں کرتے اگر (ان کی جگہ) میں ہوتا تو تم کو طلاق دیدیتا۔ حفصہ بہت زیاد تیز تیز رونے لگی۔ پھر میں نے اس سے پوچھا رسول اللہ (صلی اللہ علیہ وآلہ وسلم) کہاں ہیں ؟ بولی : وہ اوپر بالا خانے میں ہیں۔ (یہ ایک اونچی جگہ پر بنا ہوا رسول اللہ (صلی اللہ علیہ وآلہ وسلم) کا خلوت خانہ تھا) میں وہاں پہنچا تو رسول اللہ (صلی اللہ علیہ وآلہ وسلم) کا غلام رباح بالاخانے کی دہلیز پر ایک لکڑی پر پاؤں لٹکائے بیٹھا تھا۔ یہ ایک نوجوان لڑکا تھا رسول اللہ (صلی اللہ علیہ وآلہ وسلم) اس سہارے بالاخانے میں چڑھتے اترتے تھے۔
میں نے اس کو آواز دی اے رباح ! میرے لیے رسول اللہ (صلی اللہ علیہ وآلہ وسلم) سے اجازت لو۔ اس نے کمرے کے اندر دیکھا پھر مجھے دیکھا اور کچھ نہیں کہا۔ میں نے پھر آواز دی۔ اے رباح ! میرے لیے رسول اللہ (صلی اللہ علیہ وآلہ وسلم) سے اجازت لو۔ اس نے پھر کمرے کی طرف دیکھا اور پھر مجھے دیکھا اور کوئی جواب نہ دیا۔ میں نے پھر آواز بلند کرکے کہا اے رباح ! میرے لیے رسول اللہ (صلی اللہ علیہ وآلہ وسلم) سے اجازت لو میرا خیال ہے کہ نبی (صلی اللہ علیہ وآلہ وسلم) سمجھ رہے ہیں میں حفصہ کی (حمایت کی وجہ) سے شاید آیا ہوں اللہ کی قسم آپ (صلی اللہ علیہ وآلہ وسلم) اگر مجھے اس کی گردن مارنے کا حکم دیں گے تو میں فورا اس کی گردن اڑا دوں گا پھر غلام نے میری طرف ہاتھ کا اشارہ کیا کہ اوپر چڑھ آؤ۔
چنانچہ میں نے رسول اللہ (صلی اللہ علیہ وآلہ وسلم) کے پاس داخل ہوا۔ آپ ایک چٹائی پر لیٹے ہوئے تھے۔ میں آپ کے پاس بیٹھ گیا۔ اس وقت آپ کے جسم پر صرف ایک تہہ بند تھی۔ اس کے علاوہ اور کوئی کپڑا آپ کے جسم پر نہ تھا۔ چٹائی نے آپ (صلی اللہ علیہ وآلہ وسلم) کے جسم پر نشانات ڈال رکھے تھے۔ پھر میں نے رسول اللہ (صلی اللہ علیہ وآلہ وسلم) کی الماری میں دیکھا وہاں بس ایک مٹھی جو صاع کے پیمانے میں رکھی تھی اور اسی جتنے قرظ پتے تھے۔ (جو غالبا جانور کی کھال کی دباغت کے لیے رکھے تھے) اور چند گھونٹ دودھ ایک برتن میں تھا۔ بےاختیار میری آنکھوں سے آنسو بہہ پڑے آپ (صلی اللہ علیہ وآلہ وسلم) نے پوچھا اے ابن الخطاب ! کس چیز نے تم کو رلا دیا ؟ میں نے عرض کیا یا رسول اللہ میں کیوں نہ روؤں ؟ چٹائی نے آپ کے جسم پر نشانات ڈال دیے ہیں اور آپ کی الماری میں بس یہی کچھ ہے جو میں دیکھ رہا ہوں جبکہ وہ قیصر و کسری (شاہان روم وفارس) ہیں جو پھلوں اور نہروں میں عیش کر رہے ہیں اور آپ اللہ کے رسول اور اس کے خاص الخاص بندے ہیں اور یہ آپ کی کل متاع ہے۔ آپ (صلی اللہ علیہ وآلہ وسلم) نے ارشاد فرمایا :
اے ابن الخطاب ! کیا تو اس پر راضی نہیں ہے کہ یہ نعمتیں ہمارے لیے آخرت میں ہوں گی اور ان کے لیے دنیا ہی میں مہیا کردی گئی ہیں ؟ میں نے عرض کیا ضرور۔ میں جب آپ کے پاس حاضر ہوا تھا تو آپ کے چہرے میں غصہ کے تاثرات تھے۔ اس لیے میں نے عرض کیا : یا رسول اللہ ! عورتوں کی وجہ سے آپ کو کیا تکلیف اور مشقت پیش آئی ہے ؟ اگر آپ نے ان کو طلاق دیدی ہے تو اللہ آپ کے ساتھ، ملائکہ ، جبرئیل، میکائیل، میں ابوبکر اور تمام مومنین آپ کے ساتھ ہیں۔ حضرت عمر (رض) فرماتے ہیں اور جو بھی میں نے آپ سے بات کی اور اللہ کی حمد کی اس سے میرا یہ مقصد اللہ کی رضا تھا اور اللہ پاک نے پھر اپنا کلام کرکے میری تمام باتوں کی تصدیق کردی۔
وان تظاھرا علیہ فان اللہ ھو مولہ الخ وابکارا۔ التحریم : 4 ۔ 5
اور تم پیغمبر (کی ایذاء) پر باہم اعانت کروگی تو خدا اور جبرائیل اور نیک کردار مسلمان ان کے حامی (اور دوست دار ہیں) اور ان کے علاوہ (اور) فرشتے بھی مددگار ہیں۔ اگر پیغمبر تم کو طلاق دیدیں تو عجب نہیں کہ ان کا پروردگار تمہارے بدلے ان کو تم سے بہتر بیویاں دیدے، مسلمان صاحب ایمان، فرانبردار، توبہ کرنے والیاں، عبادت گذار، روزہ رکھنے والیاں بن شوہر اور کنواریاں۔
عائشہ اور حفصہ (رض) ان دو بیویوں نے دیگر تمام ازواج نبی (صلی اللہ علیہ وآلہ وسلم) کو اپنا ہمنوا کرلیا تھا (حضور سے اپنی بات منوانے کے لیے) چنانچہ میں نے رسول اکرم (صلی اللہ علیہ وآلہ وسلم) سے دریافت کیا : یا رسول اللہ ! کیا آپ نے ان کو طلاق دیدی ہے ؟ آپ (صلی اللہ علیہ وآلہ وسلم) نے فرمایا : نہیں۔ میں نے عرض کیا : یا رسول اللہ میں مسجد میں گیا تھا وہاں لوگ کنکریاں کرید رہے تھے اور کہتے تھے کہ رسول اللہ (صلی اللہ علیہ وآلہ وسلم) نے اپنی عورتوں کو طلاق دیدی ہے۔ اگر آپ اجازت دیں تو میں اتر کر ان کو خبر سنا دوں کہ آپ نے ان کو طلاق نہیں دی۔ فرمایا ٹھیک ہے اگر تم چاہو۔ پھر میں آپ سے مزید بات چیت کرتا رہا حتی کہ غصہ آپ کے چہرہ سے چھٹ گیا آپ کے دانت نظر آنے لگے اور آپ ہنسنے لگے۔ آپ (صلی اللہ علیہ وآلہ وسلم) کی مسکراہٹ تمام انسانوں سے خوبصورت تھی۔ پھر رسول اللہ (صلی اللہ علیہ وآلہ وسلم) نیچے اترے اور میں دربان لڑکے سہارے نیچے اترا جبکہ رسول اللہ (صلی اللہ علیہ وآلہ وسلم) ((کی طاقت اور پھرتی کا یہ منظر تھا کہ) بغیر کسی سہارے کو چھوئے نیچے اترے گویا ہموار زمین پر چل رہے ہیں۔ میں نے عرض کیا : یا رسول اللہ ! آپ تو بالا خانے میں صرف انتیس دن رہے ہیں۔ (جبکہ آپ (صلی اللہ علیہ وآلہ وسلم) نے ایک ماہ کی قسم کھائی تھی) آپ (صلی اللہ علیہ وآلہ وسلم) نے فرمایا : کوئی مہینہ انتیس یوم کا بھی ہوتا ہے۔ پھر میں نے مسجد کے دروازے پر کھڑا ہو کر بلند آواز میں پکارا : رسول اللہ (صلی اللہ علیہ وآلہ وسلم) نے اپنی عورتوں کو طلاق نہیں دی ہے۔ اور اللہ پاک نے یہ حکم بھی نازل فرمایا :
واذا جاء ہم امر من الامن او الخوف اذاعوا بہ ولو ردوہ الی الرسول والی اولی الامر لعلمہ الذین یستنبطونہ منہم۔ النساء : 83 ۔
اور جب ان کے پاس امن یا خوف کی کوئی خبر پہنچتی ہے تو اسے مشہور کردیتے ہیں۔ اور اگر وہ اس کو پیغمبر اور اپنے سرداروں کے پاس پہنچاتے تو تحقیق کرنے والے اس کی تحقیق کرلیتے۔ تو یہ تحقیق کرنے والا میں ہی تھا۔ اور اللہ پاک نے پھر اپنے نبی (صلی اللہ علیہ وآلہ وسلم) کو آیت تخییر نازل کرکے عورتوں کے بارے میں اختیار دے دیا تھا۔ عبد بن حمید فی تفسیرہ۔ مسند ابی یعلی، مسلم ابن مردویہ۔
بعض کتابوں میں یہاں تک یہ روایت منقول ہے اور میں رسول اللہ (صلی اللہ علیہ وآلہ وسلم) کے پاس داخل ہوا اور آپ چٹائی پر لیٹے ہوئے تھے۔ یہاں سے میں نے عرض کیا کیوں نہیں میں راضی ہوں۔۔۔ تک۔
4665: ۔۔ ابن عباس (رض) سے مروی ہے ہم حضرت عمر (رض) کے ساتھ جا رہے تھے۔ حتی کہ ہم مر الظہران پر پہنچے۔ وہاں حضرت عمر (رض) پیلو (کے جھنڈ) میں قضائے حاجت کے لیے چلے گئے ۔ میں آپ کی انتظار میں بیٹھ گیا حتی کہ آپ نکلے میں نے عرض کیا : یا امیر المومنین ! میں ایک سال سے آپ سے ایک سوال کرنے کی کوشش میں ہوں۔ لیکن مجھے آپ کا رعب و دبدبہ سوال کرنے سے روک دیتا ہے۔ حضرت عمر (رض) نے فرمایا ایسا نہ کیا کر، جب تم کو معلوم ہو کہ میرے پاس اس چیز کا علم ہے تو ضرور سولا کرلیا کر میں نے عرض کیا میں آپ سے دو عورتوں کے بارے میں سوال کرنا چاہتا ہوں۔ حضرت عمر (رض) نے فرمایا ایسا نہ کیا کر، جب تم کو معلوم ہو کہ میرے پاس اس چیز کا علم ہے تو ضرور سوال کرلیا کر میں نے عرض کیا میں آپ سے دو عورتوں کے بارے میں سوال کرنا چاہتا ہوں۔ حضرت عمر (رض) عن نے فرمایا : ہاں وہ حفصہ اور عائشہ تھیں۔ ہم جالیت میں عورتوں کو کچھ شمار نہیں کرتے تھے۔ اور نہ ان کو اپنے معاملات میں دخل دینے کی اجازت دیتے تھے۔
پھر جب اللہ پاک نے اسلام کا بول بالا کیا اور عورتوں کے بارے میں بھی (ان کے حقوق اور اہمیت کے) احکام نازل کیے۔ اور ان کے لیے حقوق رکھے بغیر اس کے کہ وہ ہمارے کاموں میں دخل دیں۔ پس ایک مرتبہ میں اپنے کام سے بیٹھا تھا۔ کہ مجھے میری بیوی نے کہا : یہ کام یوں یوں ہونا چاہیے۔ میں نے کہا تجھے اس کام سے کیا سروکار ؟ اور تو نے کب سے ہمارے کاموں میں دخل دینا شروع کیا ہے ؟ تب میری بیوی نے کہا : اے ابن خطاب ! کوئی تجھ سے بات نہ کرے جبکہ تیری بیٹی رسول اللہ (صلی اللہ علیہ وآلہ وسلم) کو جواب دیدیتی ہے۔ حتی کہ آپ (صلی اللہ علیہ وآلہ وسلم) غصہ ہوجاتے ہیں۔ میں نے پوچھا کیا واقعی وہ ایسا کرتی ہے ؟ بیوی نے کہا : ہاں۔ پس میں کھڑا ہوگیا اور سیدھا حفصہ کے پاس آیا۔ اور کہا : اے حفصہ ! تو اللہ سے نہیں ڈرتی ؟ تو رسول اللہ (صلی اللہ علیہ وآلہ وسلم) سے بات کرتی ہے حتی کہ وہ غصہ ہوجاتے ہیں ؟ افسوس تجھ پر، تو عائشہ کی خوبصورتی اور اس سے رسول اللہ (صلی اللہ علیہ وآلہ وسلم) کی محبت سے دھوکا نہ کھا۔ پھر میں ام سلمہ کے پاس آیا۔ اور اس کو بھی اسی طرح کی بات کی۔ وہ بولی : اے ابن خطاب آپ ہر چیز میں داخل ہوگئے ہیں رسول اللہ (صلی اللہ علیہ وآلہ وسلم) اور ان کی بیویوں کے درمیان بھی دخل دینے لگے ہیں۔
حضرت عمر (رض) فرماتے ہیں : میرا ایک انصاری پڑوسی تھا جب میں رسول اللہ (صلی اللہ علیہ وآلہ وسلم) کی مجلس سے غائب رہتا تو وہ مجلس میں حاضری دیتا تھا اور جب وہ غائب ہوتا تو میں حاضری دیتا تھا۔ وہ مجھے خبر دیتا اور میں اس کو خبر دیتا تھا۔ اور ہمیں غسان بادشاہ کے سوا کسی اور کے حملے کا خوف نہ تھا۔ اچانک ایک دن میرا ساتھی آیا اور دو مرتبہ ابا حفصہ کہہ کر مجھے پکارا۔ میں نے کہا (اف ! کیا ہوگیا تجھے ؟ کیا غسانی بادشاہ آگیا ہے ؟ وہ بولا نہیں، بلکہ رسول اللہ نے اپنی عورتوں کو طلاق دیدی ہے۔ میں نے کہا حفصہ کی ناک زمین پر رگڑے کیا وہ جدا ہوگئی ہے۔ پھر میں نبی کریم (صلی اللہ علیہ وآلہ وسلم) کے پاس آیا وہاں پر گھر میں رونا رویا جا رہا تھا۔ جبکہ نبی کریم (صلی اللہ علیہ وآلہ وسلم) اپنے بالا خانے میں فروکش تھے۔ اور دروازے پر ایک حبشی لڑکا کھڑا تھا۔ میں نے کہا : رسول اللہ (صلی اللہ علیہ وآلہ وسلم) سے میرے لیے اجازت لو۔ چنانچہ اس نے آپ سے میرے لیے اجازت لی اور میں اندر داخل ہوا تو آپ ایک چٹائی پر لیٹے ہوئے تھے، سر کے نیچے کھجور کی چھال بھرا ہوا تکیہ تھا۔ ایک طرف قرظ پتے (جن سے کھال دباغت دی جاتی ہے) اور کھال لٹکی ہوئی تھی۔ پھر میں آپ (صلی اللہ علیہ وآلہ وسلم) کو خبر دینے لگا کہ میں نے عائشہ اور حفصہ کو کیا کہا ہے۔ آپ (صلی اللہ علیہ وآلہ وسلم) نے مہینہ بھر اپنی بیویوں کے قریب نہ جانے کی قسم اٹھائی جب انتیسویں رات تھی تو آپ (صلی اللہ علیہ وآلہ وسلم) اتر کر عورتوں کے پاس گئے۔ مسند ابی داؤد الطیالسی۔