Maarif ul Hadith: Hadith 502

حضرت ابوذر غفاری رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے فرمایا : تمہارا کیا حال اور کیا رویہ ہو گا جب ایسے (غلط کار اور ناخدا ترس) لوگ تم پر حکمراں ہوں گے کہ نماز کو مردہ اور بے وقت کریں گے (یعنی ان کی نمازیں خشوع و خضوع اور آداب کا اہتمام نہ ہونے کی وجہ سے بے روح ہوں گی) یا وہ نمازوں کو ان کے صحیح وقت کے بعد پڑھیں گے ؟ میں نے عرض کیا تو آپ کا میرے لیے کیا حکم ہے۔ یعنی ایسی صورت میں مجھے کیا کرنا چاہئے ؟ آپ صلی اللہ علیہ وسلم نے فرمایا تم وقت آ جانے پر اپنی نماز پڑھ لو ، ۔ اس کے بعد اگر ان کے ساتھ نماز پڑھنے کا موقع آئے تو ان کے ساتھ پھر پڑھ لو یہ تمہارے لئے نفل ہو جائے گی ۔

تشریح
بنی امیہ کے بعض خلفاء اور امراء کے زمانے میں یہ پیشن گوئی حرف بحرف پوری ہو چکی ہے ۔ جن صحابہ کرامؓ نے ان کا زمانہ پایا جیسے حضرت انسؓ اور اکثر اکابر تابعین ، ان کو یہ ابتلاء پیش آیا اور انہوں نے رسول اللہ صلی اللہ علیہ وسلم کی اس ہدایت پر عمل کیا ۔