Muawtta Imam Muhammad: Hadith 281

عبداللہ بن عمر (رض) فرماتے ہیں کہ مسجد قباء میں لوگ صبح کی نماز میں تھے کہ کوئی آنے والا آیا اور کہنے لگا جناب رسول اللہ (صلی اللہ علیہ وآلہ وسلم) پر آج رات قرآنی آیات اتری ہیں اور آپ کو کعبہ کی طرف منہ کرنے کا حکم ملا ہے۔ پس ان لوگوں نے اسی وقت منہ قبلہ کی طرف کرلیا۔ پہلے ان کا منہ شام کی طرف تھا۔ اب وہ گھوم کر کعبہ کی طرف پھرگئے۔ (اس روایت کو امام مالک (رح) نے اباب ما جاء فی القبلۃ میں ذکر کیا ہے) ۔
قول محمد (رح) یہ ہے کہ ہم اسی کو اختیار کرتے ہیں۔ جو شخص غلطی سے اور طرف نماز پڑھنے لگا یہاں تک کہ اس نے ایک رکعت یا دو رکعت پڑھ لی پھر اس کو معلوم ہوا کہ وہ غیر قبلہ کی طرف نماز پڑھ رہا ہے تو اسے چاہیے کہ وہ قبلہ کی طرف پھر جائے اور اپنی بقہی نماز ادا کرے ( نئے سرے سے نماز کے اعادہ کی ضرورت نہیں ہوگی) اس کی گزشتہ نماز شمار کی جائے گی ۔ یہی امام ابوحنیفہ (رح) کا قول ہے۔