Muawtta Imam Muhammad: Hadith 45

یحی بن حاطب کہتے ہیں کہ حضرت عمر بن خطاب (رض) سواروں کی ایک جماعت کے ساتھ باہر تشریف لے گئے، ان سواروں میں عمرو بن العاص (رض) بھی تھے۔ چلتے ہوئے وہ پانی کے ایک جوہڑ پر اتری۔ عمرو بن العاص (رض) نے اس حوض کے مالک سے دریافت کیا۔ اے حوض والے ! کیا تمہارے اس حوض پر درندوں کی آمد و رفت ہوتی ہے ؟ حضرت عمر بن خطاب (رض) نے فرمایا اے حوض والے ! ہمیں مت بتاؤ کیونکہ کبھی ہم درندوں سے پہلے وارد ہوتے ہیں اور کبھی وہ ہم سے قبل وارد ہوتے ہیں۔
قول محمد (رح) یہ ہے : جب حوض بڑا ہو کہ اس کی ایک جانب پانی کو حرکت دینے سے دوسری جانب حرکت کا اثر نہیں جاتا۔ تو وہ پانی درندے کے پینے سے نجس نہ ہوگا اور نہ ہی گندگی کے ایک جانب پڑجانے سے دوسری جانب کو نجس شمار کیا جائے گا۔ البتہ اس وقت تمام نجس شمار ہوگا جبکہ پانی پر گندگی کی بدبو یا ذائقہ غالب معلوم ہو۔ اور اگر حوض چھوٹا ہو کا اس کی ایک جانب حرکت دینے سے دوسری جانب حرکت کا اثر پہنچ جائے اور اس میں سے درندہ پانی پی لے یا گندگی اس میں گرجائے تو وہ ( نجس ہوجائے گا) وضو کے قابل نہ رہے گا۔
ذرا غور تو کرو کہ عمر بن خطاب (رض) نے حوض والے کے خبر دینے کو ناپسند کرتے ہوئے اس کو خبر دینے سے روک دیا۔ یہ سب امام ابوحنیفہ (رح) کا مسلک ہے۔