Muawtta Imam Muhammad: Hadith 479

عبداللہ بن عباس (رض) بیان کرتے ہیں کہ فضل بن عباس (رض) جناب رسول اللہ (صلی اللہ علیہ وآلہ وسلم) کے پیچھے اونٹنی پر سوار تھا۔ قبیلہ خشعم کی ایک عورت رسول اللہ (صلی اللہ علیہ وآلہ وسلم) سے ایک مسئلہ دریافت کرنے آئی۔ فضل اس کی طرف دیکھنے لگا اور وہ اس کی طرف دیکھنے لگی (یہ فضل خو برو نوجوان تھا) رسول اللہ (صلی اللہ علیہ وآلہ وسلم) نے فضل کا منہ دوسری جانب پھیر دیا۔ اس عورت نے کہا یا رسول اللہ (صلی اللہ علیہ وآلہ وسلم) اللہ تعالیٰ کا فریضہ حج جو اس کی طرف سے اس کے بندوں پر لازم ہے وہ میرے باپ کو پہنچا ہے وہ بہت بوڑھا آدمی ہے۔ سواری پر بھی جم کر نہیں بیٹھ سکتا۔ تو کیا میں اس کی طرف سے حج کروں ؟ آپ (صلی اللہ علیہ وآلہ وسلم) نے فرمایا۔ ہاں اور یہ حجۃ الوداع کا واقعہ ہے ( امام مالک (رح) نے اس واقعہ کو باب الحج عمن یحج عنہ میں ذکر کیا ہے)