Muawtta Imam Muhammad: Hadith 533

ابو زبیر (رح) کہتے ہیں کہ حضرت عمر (رض) کے سامنے ایک شخص کو پیش کیا گیا۔ جس کے نکاح پر ایک مرد اور ایک عورت کے علاوہ کوئی گواہ نہ تھا۔ حضرت عمر (رض) نے فرمایا۔ یہ خفیہ نکاح ہے۔ ہم اسے جائز نہیں سمجھتے۔ اگر میں اس (قانون) کی وضاحت پہلے کرچکا ہوتا تو اس شخص کو سنگسار کرتا۔ اس روایت کو باب جامع ما لا یجوز من النکاح میں امام مالک (رح) نے ذکر فرمایا ہے۔
قول محمد (رح) یہ ہے : کہ ہم اسی کو مختار قرار دیتے ہیں کیونکہ دو سے کم گواہوں سے نکاح نہیں ہوتا۔ جس نکاح کو حضرت عمر (رض) نے رد کیا اس میں ایک مرد اور ایک عورت گواہ ہے۔ لہٰذا یہ نکاح خفیہ تھا۔ کیونکہ اس کی گواہی مکمل نہ تھی۔ اگر گواہی دو مردوں سے یا ایک مرد اور دو عورتوں سے مکمل ہوتی تو پھر یہ نکاح جائز ہوتا خواہ مخفی طور پر کیا ہوتا ۔ اس لیے کہ خفیہ نکاح کی یہی تفسیر گئی ہے کہ وہ گواہوں کے بغیر ہو۔ جب نکاح میں گواہی کامل ہوجائے تو وہ نکاح علانیہ شمار ہوگا۔ خواہ وہ اس کو مخفی کریں۔