Muawtta Imam Muhammad: Hadith 585

زہری نے بیان کیا کہ رافع بن خدیج (رض) نے محمد بن سلمہ (رض) کی بیٹی سے نکاح کیا۔ چنانچہ وہ ان کے ہاں رہیں۔ ان کی موجودگی میں رافع نے ایک جوان عورت سے نکاح کرلیا۔ اور اس کی طرف ان کا میلان زیادہ ہوا۔ پہلی بیوی نے ان سے طلاق کا مطالبہ کردیا تو انھوں نے اسے ایک طلاق دے دی۔ اور انھیں روکے رکھا۔ جب عدت گزرنے لگی تو اس سے رجوع کرلیا پھر جوان عورت کی طرف زیادہ مائل ہوگئے۔ تو بیوی نے دوبارہ طلاق کا مطالبہ کردیا۔ انھوں نے پھر ایک طلاق دے دی۔ اور اسے اپنے پاس روکے رکھا۔ جب عدت تمام ہونے لگی تو اس سے رجوع کرلیا اور لوٹا لیا۔ پھر جوان عورت کی طرف مائل ہوگئے۔ تو اس نے پھر طلاق کا مطالبہ کردیا۔ رافع کہنے لگے تم کیا چاہتے ہو ؟ اب صرف ایک طلاق باقی رہ گئی ہے۔ اگر چاہتی ہو تو اسی طرح رہو اور اگر تم پسند کرتی ہو تو میں تمہیں طلاق دے دیتا ہوں۔ زوجہ اول نے کہا میں تمہارے اس کی طرف شدید میلان کے باوجود تمہارے برقرار رہنا منظور کرتی ہوں۔ تو رافع (رض) نے انھیں روک لیا۔ اور رافع (رض) نے اس بارے میں کوئی گناہ تصور نہیں کیا جبکہ وہ (دوسری) بیوی کی ترجیح پر راضی ہوگئیں۔
قول محمد (رح) یہ ہے : کہ اس میں کوئی حرج نہیں کہ جب عورت اس کو پسند کرے مگر جب وہ پسند کرکے اس سے پھر جائے تو اسے اس کا اختیار حاصل ہے۔ امام ابوحنیفہ (رح) اور ہمارے عام فقہاء کا یہی قول ہے۔