Muawtta Imam Muhammad: Hadith 678

سلیمان بن یسار (رح) نے فرمایا کہ ایک سائبہ ( وہ غلام جس کو آزاد کرتے وقت اس کا مالک کہے میں اس کا وارث نہ ہوں گا) کو کسی حاجی نے آزاد کردیا تھا۔ وہ بنی عابد کے کسی بیٹے کے ساتھ کھیل رہا تھا۔ اس سائبہ نے عابدی کے بیٹے کو قتل کردیا۔ مقتول عابدی کا والد حضرت عمر (رض) کی خدمت میں آیا اور اس نے اپنے بیٹے کی دیت طلب کی حضرت عمر (رض) نے دیت دلانے سے انکار کردیا۔ اور فرمایا اس کا کوئی مالک نہ تھا عابدی نے کہا کیا خیال ہے کہ اگر میرا بیٹا اس کو قتل کردیتا آپ نے فرمایا تمہیں اس کی دیتدین پڑتی۔ عابدی نے کہا سائبہ گویا چتکبرے سانپ کی طرح ہے کہ اگر اس کو چھوڑ دیں تو ڈس لے اور اگر ماڈالا جائے تو اس کا انتقام لیا جائے۔
قول محمد (رح) یہ ہے : کہ ہم اسی کو اختیار کرتے ہیں ہم نہیں سمجھتے کہ عمر (رض) نے قاتل سے دیت کو ہٹادیا، اور نہ یہ خیال کرتے ہیں کہ اس دیت کو باطل کردیا کیونکہ اس کا عاقلہ ہے لیکن حضرت عمر (رض) کو معلوم نہ تھا کہ وہ عاقلہ پر دیت کو لازم کرتے اور اگر ان کو معلو ہوجاتا کہ اس کا مولی نہیں اور نہ کوئی عاقلہ ہے تو مقتول کی دیت قاتل کے مال سے یا مسکین ہونے کی صورت میں بیت المال سے دلواتے، لیکن انھیں معلوم تھا کہ اس کا عاقلہ ہے۔ لیکن کون ہے۔ اس کا علم نہ ہوسکا۔ کیونکہ کسی حاجی نے اسے آزاد کیا تھا۔ نہ آزاد کرنے والا معلو ہوسکا اور نہ عاقلہ معلوم ہوسکا۔ پس انھوں نے دیت کا باطل کردیا۔ یہاں تک کہ اس کا آزاد کرنے والا معلوم ہوسکے۔ اگر انھیں ابتداء سے ہی معلوم ہوتا کہ کوئی اس کا عاقلہ نہیں ہے تو دیت اس کے مال سے یا مسلمانوں کے کے بیت المال سے دلواتے۔