Muawtta Imam Muhammad: Hadith 744

عبداللہ بن ابی حبیبہ نے بیان کیا کہ میں نے اپنی کم عمر میں ایک شخص سے کہا۔ اگر کوئی یہ کہے کہ مجھ پر خانہ کعبہ تک پیدل جانا واجب ہے اور وہ یوں نہ کہے۔ کہ مجھ پر نذر واجب ہے۔ تو اس پر کچھ لازم نہیں آتا۔ اس شخص نے کہا میرے ہاتھ میں یہ لکڑی ہے یہ تمہیں دیتا ہوں (لکڑی اس کے ہاتھ میں تھے) تم یہ کہہ دو کہ خانہ کعبہ تک پیدل جانا مجھ پر واجب ہے۔ میں نے کہا ہاں، اور میں کچھ دیر تھہرا یہاں تک کہ مجھے عقل آئی تو لوگوں نے کجھے کہا کہ بیت اللہ تک پیدل جانا تم پر واجب ہوگیا ۔ چنانچہ میں نے سعید بن المسیب (رح) کی خدمت میں حاضری دی اور ان سے اس کے متعلق دریافت کیا تو انھوں نے فرمایا تم پر پیدل جانا ہوگیا۔ چنانچہ میں پیدل چل کر گیا۔
(اس روایت کو باب ما جاء فی من نذر مشیا الی بیت اللہ میں ذکر کیا ہے)
قول محمد (رح) یہ ہے : ہم اسی کو اختیار کرتے ہیں۔ جو آدمی خانہ کعبہ تک پیدل جانا اپنے اور پر لازم کرے خواہ وہ نذر کے طور پر ہو یا بلا نذر ہو۔ اس پر خانہ کعبہ تک پیدل جانا واجب ہوجاتا ہے۔ امام ابوحنیفہ (رح) اور ہمارے عام فقہاء کا یہی قول ہے۔