Al Tahawi: Hadith 3748

٣٧٤٨: ابوالطفیل کہتے ہیں میں نے ابن عباس (رض) سے دریافت کیا آپ کی قوم کا خیال ہے کہ جناب رسول اللہ (صلی اللہ علیہ وآلہ وسلم) نے بیت اللہ میں رمل کیا اور یہ سنت ہے انھوں نے کہا انھوں نے سچ کہا اور جھوٹ بولا۔ میں نے کہا کون سی بات انھوں نے درست کہی اور کون سی جھوٹی کہی۔ انھوں نے جواب دیا کہ اتنی بات تو درست ہے کہ جناب رسول اللہ (صلی اللہ علیہ وآلہ وسلم) نے طواف بیت اللہ میں رمل کیا اور اس بات میں جھوٹ بولا کہ یہ سنت ہے ‘ یہ سنت نہیں ہے۔ قریش نے حدیبیہ کے زمانہ میں کہا تھا محمد (صلی اللہ علیہ وآلہ وسلم) اور ان کے اصحاب کو چھوڑ دو یہاں تک کہ نتھنوں کے کیڑے کی طرح مرجائیں۔ جب انھوں نے صلح کرلی کہ مسلمان اگلے سال عمرہ کے لیے آئیں اور تین روز تک وہ مکہ میں قیام کریں تو جناب رسول اللہ (صلی اللہ علیہ وآلہ وسلم) اور صحابہ کرام آئے اس وقت مشرکین جبل قیقعان پر چڑھ گئے تو جناب رسول اللہ (صلی اللہ علیہ وآلہ وسلم) نے صحابہ کو فرمایا بیت اللہ کے پہلے تین چکروں میں رمل کرو اور یہ ہمیشہ کی سنت نہیں ہے۔ امام طحاوی (رح) فرماتے ہیں بعض علماء اس طرف گئے کہ طواف میں رمل سنت نہیں ہے اور انھوں نے اس روایت سے استدلال کیا ہے اور کہا کہ یہ صرف مشرکین کے سامنے قوت کے مظاہرہ کے لیے تھا کہ ہم کمزور نہیں ہیں۔ اس بنا پر نہیں کہ یہ ایک مستقل طریقہ ہے اور انھوں نے ان روایات سے استدلال کیا۔
تخریج : مسلم فی الحج ٢٣٧‘ ابو داؤد فی المناسک باب ٥٠۔