Al Tahawi: Hadith 4991

٤٩٩٠: شعبی نے انس بن مالک (رض) سے روایت کی ہے۔ کہ جب ہم نے تستر فتح کرلیا تو ابو موسیٰ اشعری (رض) نے مجھے حضرت عمر (رض) کی خدمت میں بھیجا۔ جب میں ان کی خدمت میں پہنچا تو انھوں نے پوچھا حجیبہ اور اس کے ساتھیوں نے کیا کیا۔ یہ لوگ اسلام سے مرتد ہوگئے تھے اور مشرکین سے جا ملے تھے۔ پھر مسلمانوں نے ان کو قتل کردیا۔ پھر میں نے اور بات شروع کردی آپ نے پھر دریافت فرمایا۔ بکر قبیلہ کے لوگوں کا کیا معاملہ ہوا۔ میں نے عرض کیا وہ اسلام سے مرتد ہو کر مشرکین سے جا ملے تھے۔ پس وہ قتل کردیئے گئے۔
تو حضرت عمر (رض) نے فرمایا اگر میں ان کو سلامت پکڑتا تو اس سے مجھے زیادہ پسند تھا۔ میں نے عرض کیا اے امیرالمؤمنین ! اگر وہ صحیح سلامت پکڑ بھی لیے جاتے تب بھی قتل کے سوا چارا نہ تھا کیونکہ وہ لوگ اسلام سے ارتداد اختیار کر کے مشرکین سے جا ملے تھے۔
آپ نے فرمایا اگر میں ان کو زندہ پکڑتا تو میں ان پر اس دروازے کو وسیع کردیتا جس سے وہ نکلے تھے اگر وہ لوٹ آتے تو ٹھیک ورنہ میں ان کو قید کے سپرد کردیتا۔