Al Tahawi: Hadith 5941

٥٩٤٠: سوید بن غفلہ کہتے ہیں میں حج کرنے نکلا تو میں نے ایک کوڑا گرا پڑا پایا۔ میں نے اسے لے لیا۔ تو مجھے زید بن صوحان کہنے لگے اس کو چھوڑ دو ۔ میں نے کہا اللہ کی قسم میں تو اسے درندوں کے لیے نہ چھوڑوں گا بلکہ اس کو ضرور پکڑوں گا اور اس سے فائدہ اٹھاؤں گا پھر میری ملاقات حضرت ابی بن کعب (رض) سے ہوئی تو میں نے ان کے سامنے اس کا تذکرہ کیا تو انھوں نے مجھے فرمایا تو نے اس کو اٹھانے میں اچھا کام کیا۔ میں نے جناب رسول اللہ (صلی اللہ علیہ وآلہ وسلم) کے زمانہ میں سو دینار کی ایک تھیلی پائی تھی میں نے اسے اٹھا لیا پھر میں جناب رسول اللہ (صلی اللہ علیہ وآلہ وسلم) کی خدمت میں آیا اور اس کا تذکرہ کیا تو آپ نے فرمایا اس کی ایک سال تشہیر کرو۔ پس میں نے اس کا جاننے والا نہ پایا۔ پھر میں خدمت نبوی (صلی اللہ علیہ وآلہ وسلم) میں آیا۔ تو آپ نے فرمایا جاؤ‘ اس کا ایک سال اعلان کرو (میں نے اعلان کروایا) مگر کوئی آدمی نہ آیا پھر میں جناب رسول اللہ (صلی اللہ علیہ وآلہ وسلم) کی خدمت میں آیا تو آپ نے فرمایا اس کو ایک سال اور مشہور کرو پس میں نے ایک سال اس کا اعلان کیا مگر کوئی اس کا مالک نہ مل سکا تو مجھے جناب رسول اللہ (صلی اللہ علیہ وآلہ وسلم) نے فرمایا اس کی گنتی اچھی طرح محفوظ کرلو اور اس کا برتن (تھیلی) اور اس کا سربند محفوظ کرلو اور تسمیہ بھی حفاظت سے رکھ لو اگر مالک آجائے تو مناسب ورنہ اس سے نفع اٹھاؤ۔ شعبہ کہتے ہیں کہ سلمہ بن کھیل کو اس میں شک ہے اس کو معلوم نہیں رہا کہ تین سال فرمایا یا ایک سال فرمایا۔ سلمہ بن کھیل کہتے ہیں مجھے یہ روایت پسند آئی تو میں نے ابو صادق سے اس کا تذکرہ کیا تو انھوں نے کہا میں نے خود یہ حضرت ابی بن کعب (رض) سے سنی ہے جیسا کہ سوید بن غفلہ نے ابی بن کعب (رض) سے بعینہٖ سنی ہے۔
تخریج : بخاری فی اللقطہ باب ١؍١٠‘ مسلم فی اللقطہ ٨‘ مسند احمد ٥‘ ١٢٦؍١٢٧‘ ١٤٣۔