Al Tahawi: Hadith 6148

٦١٤٦: عبدالرحمن بن عابس اپنے والد سے نقل کرتے ہیں کہ میں حضرت عائشہ (رض) کی خدمت میں گیا اور میں نے یہ پوچھا اے امّ المؤمنین کیا جناب رسول اللہ (صلی اللہ علیہ وآلہ وسلم) نے قربانی کا گوشت تین دن سے زائد کھانے کو حرام قرار دیا ہے تو وہ کہنے لگیں کہ بھوک والے سال ایسا کیا تھا آپ کا مقصد یہ تھا کہ غنی فقیر کو کھلائے وہ کہنے لگیں ہم پندرہ پندرہ راتوں تک پائے کو اٹھائے پھرتی تھیں۔ امام طحاوی (رح) کہتے ہیں : اس حدیث سے یہ معلوم ہوگیا کہ یہ ممانعت اس روایت پس مذکور عارضہ کی وجہ سے تھی جب عارضہ ختم ہوگیا تو آپ نے اس کا جائز قرار دیا اور یہی وہ چیز ہے جس کو حضرت علی (رض) نے حضرت عثمان (رض) کے زمانے میں رائج کرنے کا حکم دیا اور انھوں نے لوگوں کو اس بات کا حکم دیا اس کے باوجود کہ ممانعت کے بعد اس کی اباحت کو وہ جانتے تھے اور یہ بات ان کے متعلق ہمارے نزدیک ہے (واللہ اعلم) کیونکہ اس وقت اسی طرح تنگی تھی جس طرح رسول اللہ (صلی اللہ علیہ وآلہ وسلم) کے زمانہ میں تھی جب کہ آپ نے قربانی کا گوشت تین دن سے زیادہ رکھنے سے منع کیا تھا تو علی (رض) کا حکم ان دنوں میں جناب رسول اللہ (صلی اللہ علیہ وآلہ وسلم) کے حکم کی طرح تھا۔ حضرت عائشہ (رض) سے بھی ایسی روایت مروی ہے کہ جناب رسول اللہ (صلی اللہ علیہ وآلہ وسلم) نے ان کو خانہ بدوشوں کی آمد کی وجہ سے منع کیا تھا۔