١٨٥٨: عبید بن اسحاق عطار کہتے ہیں کہ حاتم بن اسماعیل نے ہمیں بیان کیا پھر اپنی سند سے اسی طرح روایت نقل کی ہے اور اس میں یہ اضافہ ہے۔ فصلی رکعتین الحدیث۔ کہ دو رکعت نماز ادا کی ہم آپ کے ساتھ تھے آپ نے اس میں جہراً قراءت فرمائی اذان نہیں دی گئی اور نہ اقامت کہی گئی اور اس روایت میں مثل صلوۃ العیدین کا جملہ بھی نہیں ہے۔ اس سے یہ دلالت مل گئی کہ روایت میں یہ الفاظ ” مثل صلوۃ العیدین “ ان کا مقصد یہ ہے کہ آپ نے عیدین کی طرح بغیر اقامت اور اذان کے نماز ادا کی۔
تخریج : بیہقی ٣؍٤٨٤‘ ترمذی ١؍١٢٤۔
حاصل روایت یہ ہے کہ صلوۃ عیدین سے تشبیہہ کا مطلب وہی ہے جو اس روایت میں مذکور ہے کہ آپ نے بلااذان و اقامت اور جہری قراءت سے نماز ادا کی جس طرح کہ عیدین میں کیا جاتا ہے۔