٣٤٨٣: عطاء نے صفوان بن یعلی بن امیہ سے انھوں نے اپنے والد سے بیان کیا کہ ایک آدمی جناب رسول اللہ (صلی اللہ علیہ وآلہ وسلم) کی خدمت اس وقت آیا جب آپ جعرانہ میں تھے اس نے اونی جبہ پہن رکھا تھا اور اس کی داڑھی اور سر پر زرد رنگ تھا اور کہنے لگا یارسول اللہ (صلی اللہ علیہ وآلہ وسلم) میں احرام باندھنا چاہتا ہوں اور میری حالت آپ دیکھ رہے ہیں۔ آپ نے فرمایا جبہ اتارو اور زردی کو دھو ڈالو اور جو حج میں کیا جاتا ہے وہی عمرہ میں کرو یعنی احرام باندھ کر طواف و سعی۔ بعض علماء نے اس روایت کو اختیار کرتے ہوئے احرام کے وقت خوشبو کو مکروہ قرار دیا ہے اور انھوں نے حضرت عمر اور عثمان (رض) کی روایات کو اختیار کرتے ہیں۔
تخریج : بخاری فی الحج باب ٧‘ مسلم فی الحج ٩؍١٠‘ نسائی فی المناسک باب ٤٤‘ مسند احمد ٤؍٢٢٤۔
احرام باندھتے وقت خوشبو لگانے میں تو کوئی اختلاف نہیں۔ البتہ اختلاف اس میں ہے کہ ایسی خوشبو جس کا رنگ و اثر باقی رہے وہ درست ہے یا نہیں امام مالک ‘ عطاء رحمہم اللہ کے ہاں احرام کے وقت ایسی خوشبو کا استعمال جس کا رنگ بعد میں باقی رہے اس کا استعمال مکروہ ہے۔
نمبر 2: ائمہ ثلاثہ اور ابن عباس و عبداللہ بن زبیر ‘ امّ المؤمنین عائشہ ] کے ہاں مطلقاً خوشبو لگانا درست ہے کچھ حرج نہیں۔